ZALEN September 15, 2024 : July 25, 2024 atanga Myanmar atanga Zokhawthara bungraw lakluh khap chu vawiin thlengin chhunzawm a la ni a, ramria insumdawn tawnnaah harsatna a thleng chhunzawm zel.

Zokhawthar atanga ZALEN thudawn danin ramria insumdawn tawnna khar a nih bakah lirthei hmang pawhin inkalpawh phal a ni lo a, hian ke erawh chuan inluh chhuah theih a ni.

He hmalakna hi sawrkar laipuia Ministry of Home Affairs thu anga kalpui niin Assam Rifles-te ngawrh takin an duty a, Myanmar atanga bungraw lakluh phal a nih loh avang hian Zokhawtharah Myanmar bungrua a lut thei lo a, hei hian Mizoram hmun hrang hrangah pawh nghawng a nei mek a ni.

Zokhawthar hi Tiau lui kama awm a ni a, a ral lehlam Myanmar lam Tiau kamah Khawmawi khua a awm a. Khawmawi leh a chhehvelte leh Zokhawthar chu inkalpawh mamawh, inthian tha, chhung leh khat an ni a. Hnam khat nih vangin free movement regime a awm a, passport leh visa tel lova inkalpawh thei an ni.

Myanmar atanga bungraw lakluh hi Zokhawthar mipuite eizawnna lian niin a sumdawngah an tang lo a nih pawhin bungraw thiara inhlawh hi hna a tling a. Mahse, kawng khar a nih hnuah hna a vâng chho mek a, Mizoram hmun hrang hrangah pawh Myanmar bungruate a to chho mek zel bawk.