Myanmar ram buaina kal mek zelah Chin State-ah sipaiten sikulah indo thlawhna hmanga bomb an thlakah mi 11 an thi a, an zinga pariat chu naupang an ni tih thingtlang khaw miten an sawi.

Tual chhung mite chuan tlangram khaw kilkhawr tak, Vuilu hi Nilainia beih kha niin an sawi.

Myanmar-ah hian kum 2021-a sipaiten mipui sorkar an paih thlak hnuah duh lotu hel pawl hrang hrangin sipaite hi bei letin tual chhung indona a chhuak mek.

Chin State hi sipai sorkar duh lotu tamna hmun a ni.

Tun karah pawh Chin fighter-ten India nena inrina bula awm, Rikhawdar an la nghe nghe.

Hetih lai hian Vuilu-ah hian hel pawl tumah an awm lo va, in 80 pawh tling lo niin state chhim lam kila awm an ni.

Mi chengten social media-a an tar lanah chuan sipai thlawhna hian Nilaini zanah khan bomb pahnih vel an thlak a ni.

Pakhat zawk hian in pakhat, sikul atan an hman a fuh a, naupang pariat bakah puitling pathum, lehkha zira awmte an thi a. An zingah hian zirtirtu kum 34 mi, Ha Luang leh a nu leh a fate pahnih an thi.

Naupang thite hi kum sarih leh 11 inkar an ni a. Bomb hian in dang leh khuaa in pahnih a tichhe bawk.

Chin State hi sipaite leh chi bil hel pawl hrang hrangte an inbei nasa hle a; mahse, tual chhung mite chuan Vuilu leh a chhehvelah hian eng inbeihna mah a awm ve lo niin an sawi a, an khua beih a nih chhan hi an hre lo.

Sipai sorkar hi chawlhkar thum liam ta chhung khan ram chhung hmun hrang hrangah anmahni eptute nen an inbeihnaah an tlawm nasa hle a, beih let nan thlawhna an hmang uar hle.

Chin State hi kum 2021-a sipai sorkar a din leha ralthuam nena bei let hmasa ber an ni a, tualchher silai hmangin sipai convoy an bei nasa hle.

Tual chhungah sipai pawl zau takin an din a, tlangram state hi Chin Defence Force hnuaiah awmin India ram atangin hmanrua an dap khawm mek.

Chin State chhim lam, Paletwa khua leh a chhehvelah sipai leh ralthuam tha tak tak nei, Arakan Army an inbei nasa bawk a, AA hian an thenawma Rakhine State zau tak an thunun tawh a ni.

Chi bil Chin hel pawl hian sipai hmun eng emaw zat an la tawh a, sipaite chu khaw lian deuhvah tlan khawmin barrack-ah an inkulh hlawm.

Chin hi Kristian tamna a ni a, sorkar laipuiin a ngaihthah niin an inngai a. Tun hma atang tawhin ralthuam nena hel an tam em em reng a ni.

Ram chhung hmun dang, China nena inrina, Shan State-ah pawh sipaite hi hnam bil hel pawl pathum tangkhawm nen an inbei nasa hle bawk a. Hmun dangah pawh mipui rorelna duhtu tam takin sipaite hi an bei bawk.

Sipaiten president atana an dah chuan sorkarin Shan State-a buaina hi a hmet mit vat lo a nih chuan an ram chu a inthen mai dawn niin a sawi.

UN Secretary General Antonio Guterres chuan tun karah khan tual chhung indona abvang hian mi maktaduai hnih zet baihvai mek niin a sawi.