November 22, 2023; Champhai Addl. District & Session Court in Myanmar Sipai raltlan chu kum 10 jail tang tur leh pawisa chawi turin a hrem.

Myanmar Sipai raltlan Min Aung hi nikum khan Myanmar Sipai atangin Silai nen a rawn tlan bo a, Champhai Zote-a raltlante dahkhawmna hmunah a awm a, nikum September thla khan raltlan zing a mi ve tho Lalmuanpuia-te nupa chu an awmna pindanah luhchilhin zu lei turin a tir a, raltlan camp-ah hian zu leh ruihtheihthil lakluh phal a nih loh avangin Lalmuanpuia nupui Malsawmsangi chuan an kal theih loh tur thuin a chhang a, Min Aung-a thinrim chuan a chempuiin Malsawmsangi hi a nghawng leh a malpuiah a sat a, a nupui chhan tumtu Lalmuanpuia chu a khup dinglamah a sat zui a. Min Aung hi tlanbo zuiin, Hmunhmeltha phaia thlam pakhatah manin Champhai Police kuta hlan a ni.

He thubuai ngaihtuahtu Champhai Addl. District & Sessions Judge, Sylvie Zomuanpuii Ralte chuan, thuhretu hrang hrangte thu sawi leh finfiahna atangin Min Aung hi thiam loh a chantir a, tualthah tum thubuaiah kum 7 chhung lung in tang tur leh Rs. 2,000 chawi turin a ti a, na taka mi a hliam avangin kum 3 chhung lung in tang tur leh Rs. 1,000 chawi turin a hrem bawk a, a hremna hi a hran ve ve-a kalpui tur niin, kum 10 chhung lung in a tang ang a, Rs. 3,000 a chawi a ngai dawn a, a sum chawi tur hi a pe thei lo a nih chuan thla 3 dang a tan belh a ngai dawn a ni.