November 15, 2023; India ramri-a Myanmar mipui sipai tangrual pawl leh Myanmar Sipai inkahna thlengah, Myamnar Sipai 43-te chu Mizoram Police kutah an inpe a, nimin khan Hnahlan Helipad atangin Helicopter hmangin India-in Sipaite hi Myanmar-ah a thawnkir.

CCN News, Champhai in a tarlan danin,

niminpiah khan pipui sipai tangrual pawlte hian India ramri hnai Rih leh Khawmawi Sipai Camp chu beiin nimin khawvar rual vela Rih Sipai Camp an luh chhuah hnuah tlai dar 4 vel khan Khawmawi Sipai Camp an luh chhuah leh a ni.

Myanmar Sipai 39 te chu niminpiah tlai thim hlim khan ramri kana India ram rawn lutin Mizoram Police kutah an inpe a, nimin zing khan midang 4 in pek belh lehin Myanmar sipai 43-te chu Mizoram Police kutah an inpe a ni.

Heng Sipaite hi Mizoram Police chuan Ministry of Home Affairs thu angin Assam Rifles kutah a hlan a, nizan hmasa khan sipaite 38 te chu Hnahlan panpui nghal niin an zinga pakhat hliam tuar chu Champhai District Hospital-ah dah luh a ni a, nimin zinga inpe thar te pawh Hnahlan-ah hruai nghal an ni a; nimin chawhma dar 9:30 vel atang khan India chuan Helicopter hmangin Myanmar sipaite hi Myanmar sawrkar kutah a hlan kir a, Helicopter hian tum 4 hruaiin nimin chawhnu dar 1 vel khan Myanmar Sipai 42-te hi Myanmar lamah phurh luh fel an ni.

CDF Hualngoram Gen. Secy-in CCN a hrilh danin he inbeihna hi Chin National Army leh CDF Hualngoram huaihawt niin CDF Thantlang, CDF Zaniatram leh PDA tangkhawmte chuan Myanmar Sipaite hi an bei a, Sipai Camp an lak tak avang hian Tiau (Khawmawia) Myanmar National Flag intar chu la thla-in Chin National Flag an tar a ni.

He inbeihnaah hian mipui sipai lam 9 an thi a, mi 20-in hliam an tuar bawk a, Civil mi 1 in nunna a chan a, civil mi 2 in hliam an tuar bawk a; hliam tuarte hi Mizorama lamah enkawl an ni a, Myanmar Sipai hliam tuar 1 chu Champhai District Hospital-ah enkawl mek a ni bawk.

He inbeihnaa Myanmar sipai thi zat chu hriat ni lo mah se, Mizoram Police kuta inpe tih lohte chu an thih vek rin a ni a, Rih leh Khawmawi Sipai Camp-ah hian mi 60 vel ve ve an awm ni-a hriat a ni.

Mipui sipaiin Sipai Camp pahnih an lak hnu hian Myanmar Sipaiin Jet Fighter hmanga Bomb vawikhat a rawn thlak leh tih loh chu Silai leh Bomb ri hriat tur a awm rih lo a, nimin lamah Myanmar sipaiin indo thlawhna leh Helicpoter hmangin a rawn bei leh dawn tih thawm a awm avangin Zokhawthar veng hnuai lama awmte chu hmun him lamah insawn turin khawtlang hruaitute chuan an hriattir a, chanchin buatsaih lai thlengin inbeihna erawh chu a thleng rih lo a ni.