Aizawl: Nimin khan Mizoram Youth Commission Chairman Joseph Lalhimpuia hovin Mizoram chhunga kohhran thalai pawl hrang hrang hruaituten kut insuihin Zoram thalaite tana Pathian hnena tawngtaihona hun an hmang. He tawngtaihona hunah hian Kohhran hrang hrang thalai pawl pakua  Central KTP (PCI), MTKP (BCM), Territorial Salvation Army Youth, Diocese Catholic Thalai, General PYD (NE), General PYD (MZ), Adventist Youth Ministry, LIKBK TKP, KrizyhpaThyutlia Py (ECM) te an tel. Kohhran thalai hruaitu kalkhawmte chuan Kohhranin daidanna bang thiat veka MYC hmalakna chu fakawm tiin, Zoram thalaite tana thawhhona tur forum siam a ni ta chu Pathian remruat a ni ngeia an hriat thu an sawi. MYC Chairman office a luah tan ni, January 25, 2018-a an lo sawiho tawh angin Kohhran thalai pawlte nen hian India ram hmun hrang hranga thalaite tana hmun pawimawh tlawha zinho dan tur Chairman Chamber-ah relzui nghal a ni a. MYC Exposure Tour 2018 a zinchhuak tur hian Central KTP leh MTKP atangin aiawh pathum ve ve an inthlangchhuak ang a, Territorial Salvation Army Youth, General PYD (NE), General PYD (MZ), Diocese Catholic Thalai, Adventist Youth Ministry, LIKBK TKP, KTP (ECM) aiawh pahnih theuh inthlangin kal tur inruatfel hunah meeting neih leh tum a ni a, ruahman dan chuan August thla chawhma lamah he tour hi kalpui tum a ni. Nimin meeting-ah hian MYC Chairman Joseph Lalhimpuia chuan tunlai khawvel thiamna chhuak thar zelin Mizo thalaite a run mek lai hian thalaiten nun innghahna bulfuk, tum mumal tak neia khawvel ke pen ruala an pen ve theihna tura thawhho puiah Kohhran thalaite chu a sawm a. Thalaiten nun kawngdik an zawh theihna turin School Education Dept. leh Higher & Technical Education Dept. te hnenah ngenna siam ni se. An enkawl lai school zawng zawngah kumin chhung hian ni khat tal Moral Education pekna hun atana hman nise an ti a. He hunah hian Pastor-te leh khawtlanga mi zah kai chin naupangte zirtir tak tak thei tur te sawm ni se, an ti bawk. MYC Chairman chuan Kohhran thalaite chuan mahni pual inkhawmah vawi khat tal Zoram thalai chhan chhuah ngai mekte leh thalaite hmahruaitu tur zawng zawng tana tawngtairualna hun hmang turin a sawm a, he a sawmna hi tihhlawhtlin ngei an tum thu Kohhran thalai hruaitu kalkhawmte chuan an sawi a, Zoram thalaite tan ke pen hova hmalak ho zel nise an ti bawk.