Aizawl: Mizoram Youth Commission chuan phailama training turin thalai 3640 an tir tawh a, an tirh zinga 1000 vel chuan hna an hmu tawh. Nimin khan Aizawl Press Club ah chanchinbumite kawmin Mizoram Youth Commission chairman T. Sang-kunga MLA chuan phailama an tirh 3640 zinga 2050 in training an zo tawh tih sawiin hetih lai hian eng emaw harsatna hrang hrang vangin training zo lova lo haw 185 an awm tih a sawi bawk. MYC chairman chuan DoNER Ministry chuan skill development project an siam chu an pawm tih a sawi a. "MYC project atan vaibelchhe 2.48 min pawmsak a, 1st installment ah nuai 188.25 min pe nghal a. He pawisa hmang hian Hospitality, Aviation, Retail, Tourism leh IT ah te training pek kan tum a, Mizo thalai a tam thei ang berin chhawr tangkai se kan duh hle a ni," a ti. MYC chairman chuan training na tur atan hian India ram hmun hrang hrang atangin diltu 80 awm zingah 14 thlan an ni tiin chung zingah chuan MYC pawh a tel tih a sawi a. Training chu hmarchhak pum huap tur nia sawiin training hall atan MYC office hnuai chu chei mek anih thu leh hna hmu vek tura tan lak an tum thu a sawi bawk. Training hi mi 400 tana ruahman a ni a, seat awmdan chu Hospitality 260, Aviation 50 leh Retail, Tourism leh IT ah 30 theuh a ni. MYC chairman chuan Singapore a thawk turin thalai mi 35 te training pek tum an nih thu a sawi a. "Singapore a hnathawh tur zawnsaktu agency te hian thil tul buaipuinan an thla 7 hlawh te an cut sak thin a, hei hi a tam lutuk deuh niin kan hria a. Singapore sawrkarin interpreter atana an hman Sawmpuii te nen tang hovin senso tlem zawk, thla 5 hlawh cut a risk lak kan tum a ni," a ti. Chairman chuan Singapore a inthawn chu an huphurh hle nia sawiin mahse kal an awm reng tho si avangin hmalak an tum ta tih a sawi bawk. Heng bakah hian thalai tam zawk sipaia an luh theihna atan te, UPSC Civil Services Examination coaching class buatsaih tura hmalak anih mek thu te a sawi bawk.