ZALEN October 7, 2025 : Mizoram Youth Commission Chairman Malsawmzuala Ralte leh Jonathan Lalremruata, OSD to CM te chu vawiin khan India-a Taiwan Ambassador Mumin Chen Office-ah an leng a, Mizo thalaite Taiwan-a hnathawk tura an kal theih dan tur an sawiho. Kumin chhung hian Mizo Thalai 50 tirh hman an tum.

Jonathan Lalremruata, OSD to CM-in kar hmasaa a lo dawr tawh bawhzuiin, vawiinah hian India leh Taiwan-in hnathawk tur thawnchhuah kawnga inremna, India-Taiwan Labour Mobility Agreement 2024 hnuaiah, Mizo thalai 50 kumin chhunga Taiwan-a tirh ni se an ti a. Taiwan-a thawk tur zawn, agreement ziah leh tul dang zawng zawng chu MYC-in a buaipui ang.

Taiwan-a hnathawk tur hian kum 18 chunglam mipa leh hmeichhia, hriselna endik paltlangte an kal thei dawn a. An thawhna tur company-in kal man leh senso tul an rawn tumsak dawn a ni. Taiwan sawrkar hian an rama hnathawkte enkawlna dan mumal leh changtlung tak (Protection of Foreign Workers Right in Taiwan) an nei a, chumi hnuaiah chuan Mizo thalai kal turte pawhin him takin hna an han thawk thei dawn a ni. 

Taiwan hi Ei leh in, sik leh sa leh a ram leilung thu-ah Mizoram nen a inan thu Ambassador Mumin hian a sawi. Ambassador Mumin leh Jonathan-a te hian Chinese tawngin Mizoram chanchin Chinese chanchinbu lar tak Rhythms-ah an lo chhuah tawh a ni.

Taiwan-a hnathawh dan tur leh tul dang chu MYC in a la rawn tichhuak thuai dawn a ni.