ZALEN August 28, 2026 : Mizoram Youth Commission (MYC) chuan vawiin khan MYC Auditorium, MINECO-ah Mizo thalai ten eizawnna tlak thiamna an neih theihna tur atana buatsaih, a thlawna kalpui nail technician training batch 2 na kharna hun an hmang.

He hun hi MYC Chairman Malsawmzuala Ralte chuan a hmanpui a, training chhuakte chu an thiamna hmang tangkaia, dinhmun sang zawk thleng thei turin duhsakna a hlan, MYC-in a pek hmanrua te uluk taka hmang turin a chah bawk.

Training chhuakte pualin marketing class neih niin, MZU Incubation Centre-a Prof. Laldinliana leh Lalremmawia te chuan sumdawnna kalpui dan leh e-commerce hman tangkai dan an zirtir.

Batch 2-ah hian training chhuak hmeichhia 27 an awm a, Batch 1-ah July ni 31 khan hmeichhe 25 ten training an zo tawh bawk. 

MYC hnuaia nail technician training chhuak hi mi 52 an ni a. Training chhuakte chu certificate pek bakah eizawnna tur bul an tanna atan hmanraw chi hrang hrangte a pe (handhold) bawk a ni.