Mizoram Youth Commission chuan thalai hlawhtlingte zirchiangin thlanchhuaha cheng Nuai 1 pek a tum a, hemi MYC Young Achiever’s Award State Level Committee chu an thukhawm tawh a. District level-ah Deputy Commissioner hovin commitee din leh a ni a, district hian an thlan chhuah te chu state level-ah chhawp chhuakin thalai hlawhtling hnenah pawisa fai hi pek tur a ni dawn a ni. MYC Young Achiever’s Award hian a huang zau ang reng viau a, mahni zirna, hnathawhna, eizawnna leh mawhphurhna hlan chhuak tha kum 40 hnuai lam thlan a tum a ni a. Mi hriat la hlawh zen zen lo entawn tlak an nih a ngai dawn bawk a ni. Kan thalaite hi kaihhruaitu nei lo tam tak an awm a, zirlai an nih atangin an hmahun uluk taka thlirpuitu an nei mang lova, an phak tawk angin an zir mawp mawp a, an zir tur ang an zo mawl tawp ni hian a lang ber a ni. Chutah an han zir zova hnathawh mumal nei lem lo a remchang ang ang thawk bawrh bawrh, kawng kawh hmuhtu nei lo hi a tam zawk an nih a rinawm a. Media leh thil dang atangin rilru sukthlek leh ngaihtuahna a ni lo lama hruai thei thil  tak tak a rawn chhuah zawih zawih lai a nih avang hian tun hun hi siamthat duhte tan chuan ‘intervention’ neih hunlai tak a ni a. An thawh thiam ang tawk kawh hmuhtu thalaite hian an mamawh ngawih ngawih a ni ber e. Tam tak chu that chhe hrim hrim an awm ang a, hetih lai hian rilru nei tak si kal ngaihna hre lo thahnem tak an awm tih hriat nawn a tha ang. MYC thil tum hi a tha ang reng hlein a hriat a, tunlai thalaite hian entawntlak mi ngaihsan tur an mamawh a, chutiang mi hriat la hlawh lem lo chu zawn chhuaha, tarchhuaha ngaihsantlak tura phochhuah an tum ber niin a lang a ni. Chutih rualin a huang hi a zau em em a, zirna kawnga titha ringawt pawh hi khaikhin tham an awm dawn a, hnathawk leh eizawnnaa hlawhtling te nen hrut rual vek tur a la nih hmel a. Endiktu lam tan thil namai lo tak niin a hriat a, fimkhur a ngaih dawn bakah fir pawh a ngai viau dawn a ni. Hetia  a lan dan mai chuan district selection committee hi an pawimawh hle dawn niin a hriat a, an thlanchhuah vawm khawmte chu state committee-in a lo endik leh tur a nih avangin a bul thut a dik a ngai dawn khawp mai, helai hi MYC lam pawh a invenna tur ber niin a lang a ni. Candidate tur an zawn danah pawh ‘chu chu a tha ang a’ ti ngawt lova uluk taka mi an zawn a ngai dawn a. Mi an thlan chhuah te chu state pum aiawh tur an nih dawn avangin district atanga candidate thlan chhuahah hian lak lap emaw induhsak bik emaw a theih dawn miah lo tihna a ni a. A hnua sawisep a awm lohna turin thui zawk an thlir a va tul em. Thalaite ngaihsan tur kan zawnnaah hian fimkhur a ngai khawp a, changkang leh lutuk, thalai nawlpui tana awmzia leh tangkaina nei lem lo engtikah mah an han nih/tawmpui theih loh tur kan thlang chhuak ang tih te rilruah dah a ngai awm e. Kan thalaite dinhmun a inang lo hle a, thenkhat chu chhungkuain a zir avanga dinhmun sang tak thlenga invawrh thei ‘hun tha’ an neih avanga an thlen chin thleng thei te an nih lai hian chutiang ang ni ve ta lo retheihna in a nuai leh ‘hun tha’ (opportunity) neih loh avanga  tum ram thleng thei ta lo a tam zawk an ni mek a ni. Hna inngaihsantirah pawh han thlek maia lang mawi tak chhungkaw tana chhenfakna ni hauh si lote a awm a, mi hnuaihnung zawkin an thawh tura kan dah tlat sumpai tam zawk lakluhna ni si tam tak a awm tawh a, chutiangte chu lehkha thiamten an thawh phei chuan awmze nei lehzuala kalpui theih nia lang mekte an ni lawi si a ni. ‘Thalai’ sawi chuan ‘hma hun’ tih sawi loh theih loh a ni a, chumiin a ken tel chu eizawnna leh an mahni kaihhruaitu tha a ni a. Heng phawk chhuak zo tur hian tuna MYC-in thalai ngaihsanawm thlan chhuah a tum pawh hi kalpui ni sela a fuh berin a rinawm a ni.