Aizawl: Mizoram Youth Commission (MYC) leh IAS Coaching Institution Alternative Learning System (ALS), Delhi chuan Mizoram thalai mi 180 tan IAS Online Coaching leh HSSLC (Science) zirlai mi 400 tan IITJEE/NEET Online Coaching kalpuina turin inremna an ziak. MYC Chairman Joseph Lalhimpuia leh Prateek Bhattacharya, National Sales Head, ALS Satellite Education Pvt. Ltd., Delhi ten May ni 31, 2018 khan MYC Office, Aizawlah inremna hi an ziak a, hei hi UPSC Civil Service Examination leh Engineer & Medical Entrance Test-a Mizoram thalai leh zirlaite tan dam khawchhuahna tling tur a nih ngei MYC Chairman chuan a beisei thu a sawi a. MYC Online Coaching kalpuina tur satellite khawl VSAT (Very Small Aperture Terminal) pawh MYC mamawh tur ang ALS-in an rawn bunsak nghal dawn thu te, VSAT khawl pakhatin Classroom pahnih zel chawm thei tur MYC-in an chah tih a sawi bawk. MYC chairman chuan July 2018 thla tir lama Online Coaching Class hawng tura chak taka an inbuatsaih thu te, Scholarship Examination pawh buatsaih thuai turin Delhi atanga ALS Team an chah nghal tur thu a sawi a. Mizoram thalai leh zirlaite chu Tribal quota nen lo pawha IAS bakah Engineering/Medical College tha chang pha tura inzir turin a sawm bawk. ALS hotu Prateek Bhattacharya chuan MYC Online Coaching zawmtu zinga mi 200 tan Scholarship Rs. 33.04 lakh an phalsak nghal thu leh Civil Service hnaa luh tum IAS Coaching zawm tur Scholarship Examination-a top 100 tan Rs. 24.78 lakh leh Engineer leh Doctor nih tum IITJEE/NEET Coaching-a kal turte Scholarship Examination-a top 100 tan Rs. 8.26 lakh an sanction nghal thu a sawi bawk. Scholarship dawng turte bakah hian MYC Online Coaching-ah hian IAS atan mi 80 leh IITJEE/NEET-ah zirlai 300 tan MYC chuan fee concession a siamsak dawn a, Scholarship hmu phaho tan pawh an scholarship hmuh theih zat milin tanpuina leh lawmpuina ruahmansak an ni dawn a ni.