ZALEN March 20, 2026: Vawiin khan Power & Electricity Department-in kum 2026-27 atana eng chhit man (Electricity tariff) a rawtna chungchangah Mizoram Electricity Regulatory Commission (MZERC) chuan Public Hearing a nei.

Public Hearing hi MZERC Chairperson Benjamin L.Tlumtea kaihhruaina-in Aijal Club-ah neih a ni a. Hun bituk chhunga mipuite'n rawtna leh sawiselna an thlente leh P&E department-in an chhannate ngaihthlak a ni.

2025-2026 leh 2024-25-ah te eng chhit man hi tihsan a ni tawh lova, tuna P&E department-in rawtna a thehluhah pawh hian eng chhit man tihsan rawtna a awm lova, mipui atanga Revenue sum mamawh zat (ARR) a hmuh tlin lohna chu Sawrkarin subsidy-in a peksak dawn a ni. MZERC chuan a zir chian hnu-ah kum thar FY 2026-27 atana Sawrkar pek tur subsidy leh eng chhit man tur zat hi a bithliah dawn a ni.

Multi-Year Tariff Regulations, 2014-in a phut angin P&E department hian kum tinin mipui hnena power supply enkawl nana sum leh pai a mamawh (Aggregate Revenue Requirement) leh eng chhit man bithliah chungchanga rawtna a neihte chu Commission hnenah a theh lut thin a. Rawtna hi newspaper-ah chhuahin mipui vantlang (consumers leh stakeholders) tan sawiselna hun emaw, thurawn pekna hun emaw hawn thin a ni a. Sawiselna emaw, thurawn emaw pe duhte chuan MZERC hnenah ziakin (Affidavit hmangin) an thehlut thin a ni.