MZI Rimawi Award Winner

Mizo Zaimi Inzawmkhawm (MZI) chuan Zirtawpni zan khan Dawrpui Multipurpose Centre-ah Rimawi Award an sem. He hunah hian award chi hrang hrang sem chhuah niin, Song of The Year (Gospel) atan Israela Pachuau hla sak 'Eliza hun ropui' chu thlan a ni. Lengzem lamah BZI Chhangte hla sak 'Ka tana chuai lo kha' tih hla chu Song of The Year atan thlan a ni bawk. 

Zoramchhani a inlar
Rimawi Award-ah hian mimala langsar ber tih ngam chu Zoramchhani a ni a, award pahnih a hum haw. Zoramchhani Band te chu Band of The Year atan thlan an ni a, an band hming put chhan Zoramchhani chuan an band aiawhin award hi a dawng. Youth Icon atan thlan hmasak ber Zoramchhani zaithiam zia sawi nawn a ngai lo - Best Singer (Female) atan thlan a ni hian a tichiang viau awm e. 

Gospel-ah hian Best New Singer atan Zorema Khiangte chu thlan a ni a, mipuiin kan hmel hriatna la rei lo mahse a talent ropui zia kan hmu chho zel. Best Group/Duo (Gospel) chu Duhsaki leh Zorema te kutah hlan an ni a, an phu ang ngeiin chawimawina an dawng. 

TBC Zaithanpuia'n covid-19 hla tha tak a phuah chhuah 'Min chhang hram rawh' tih hla hmangin Song Composer of The Year award a dawng a, Lallawmawma 'Lungawina Famkim' chu Music Video of the Year atan thlan a ni bawk. Best Singer (Male)
chu Jonathan Lianhna a ni.

Award dawng thei

Esther Hnamte
Rimawi Award-ah hian chawimawina dawng thei naupangh ber chu Lunglei naupang Esther Hnamte a ni. Kum 5 mi lek ni chunga ram pawn thlenga hriat hlawh ni thei Estheri hian 'Jana Gana Mana' hla a sak hmangin Artist on The Non-Native Song
award a hlawh chhuak a ni. 

Best New Singer (Lengzem) atan Mazuali K thlan a ni a, Best Music Video (Lengzem) atan K. Lalthlamuanpuii 'Khuangchawi thla' chu thlan a ni bawk. Best Traditional Singer atan Lalenkawli Pautu thlan niin, Best Singer Female (Lengzem) award chu Sangtei Khuptong kutah hlan a ni a, 'Thinlung khawngaih thlak' tih hla thiam taka satu Francis Lallawmkima chu Best Singer Male (Lengzem) atan thlan a ni bawk. 

New Singer of the Year-ah Youth Icon!
Rimawi Award-ah hian category hrang hrang awmin, chung zinga pakhat chu New Singer of the Year a ni. He category hi Gospel leh Lengzem huangah a hrana siam niin, Gospel bikah hian nominee zingah Youth Icon Zothanpuii hming a lang ve nawlh mai. 
Chanmari West nula Zothanpuii hi kum 2019 khan Youth Icon atan thlan a ni a, Best New Artist category-ah a hming a lang ve lawi si - a inhmeh lo kan tidawn nge Youth Icon a tihlu lo kan tizawk dawn? Award a la dawng lo zui!

Rimawi Award-ah hian zaithiam tha tak tak - Jonathan Lianhna, Zorema Khiangte, Andrew Laltlankima leh Zothanpui bakah, midang eng emaw zat an perform a ni.