ZALEN, August 11, 2025: Inter College 9 Ball Pool Championship hmasa ber, Zote Honda MZP & MSBA Inter College 9 Ball Pool Championship 2025 chu Zirtawpni tlai khan a zawh fel a ni a, mipaah Govt J Thankima College (JTC) zirlai, C Lalramluahsanga a champion.

JTC zirlai, Ramluahsanga hian final-ah 5-3-in Lunglei Government College (LGC) zirlai, Joseph R Lallawmawma a hneh a ni. 

Hmeichhia-ah Government Mizoram Law College (MLC) zirlai, Lalrinkimi pakhatna a ni a, Government Aizawl College (GAC) zirlai, Mary Lallenkimi chu final-ah 4-2-in a hneh.

Doubles final-ah LGC atangin, Joseph-a & Lalfakzuala Khiangte ten JTC zirlai, Ramluahsanga & Lalrinnunga te tangdun chu 4-1-a hnehin an champion ve thung.

MZP & MSBA Inter College 9 Ball Pool Championship 2025 hi Nilaini atanga MSBA Hall, Hawla Indoor Stadium, Republic Vengthlang, Aizawla khelh tan a ni a. Inelnaah hian college pakua atangin zirlai 29 an tel a, an zingah hian hmeichhia panga an tel.

Pachhunga University College (PUC) chu zirlai thawh hnem berin pakua (mipa pasarih leh hmeichhia pahnih) an thawh a, a dawttu hi GAC niin zirlai paruk (mipa pali leh hmeichhia pahnih) an ni a, heng bakah hian, Govt Mizoram Law College-in zirlai pali (mipa pathum leh hmeichhia pakhat) an thawh bawk.

Hmeichhe player hi college pathum - MLC atangin pakhat, GAC leh PUC atangin pahnih ve ve an tel a ni.

Final inkhel leh lawmman sem inkhawm chu MZP President H Lalthianghlima’n a hmanpui.

MZP & MSBA Inter College 9 Ball Pool Championship 2025 hi Explore Mizoram Youtube channel-ah live a pekchhuah thin a ni.

FINAL RESULT:

Men: C Lalramluahsanga (JTC) 5 - 3 Joseph R Lallawmawma (LGC)

Women: Mary Lallenkimi (GAC) 2 - 4 Lalrinkimi (MLC) - Race to 4

Double: Joseph R Lallawmawma & Lalfakzuala Khiangte (LGC) 4 - 1 C Lalramluahsanga & Lalrinnunga (JTC)