Aizawl September 26, 2024 : Home Minister K. Sapdanga chuan vawiina Mizo Zirlai Pawl General Assembly Vawi 68-na Champhai Tlangsam a neih mêk a hmanpui naah MZP chu zirlaite mipuitlinga siamtu tur an nih thu a hrilh.

K. Sapdanga chuan, "MZP hi zirlaite mi puitlinga siamtu tur a ni a, ramin hma a lo sawn a, ram tana dinhmun duh khawp lohna avanga zalenna sual a lo thlen pawh khan zirlaite'n kan ram tan nasa takin hna an lo thawk tawh a ni," tiin, "Ram leh hnam humhalh lam kan uar hle a, tuna kan hnam min rûntu nasa ber chu ruihtheihthil a ni a, kuminah ringawt pawh heroin kg 60 kan man tawh a, an thatlai hun hmang tha thei lovin thalaite'n an nunna hlu tak an chan mek a ni," a ti.

K. Sâpdanga chuan "Helai hmun hi hmun dang atanga ruihlo lo luhna kawtkai a nih avangin helai hmun atang hian ruihhlo do beihpui thlak kan ngai a, kan police-te an hah em em a, tlaivarin rim takin hna an thawk a, tlawmngai pawl hrang hrang-te'n an tawiawm bawk a, a lawmawm hle a ni," a ti.

Home Minister chuan, "Vawiin thlengin nau piang record ah mipa an tam zawk zêl a, an lo thang lian zêl a, vote nei thei an lo nih hian mipa aiin hmeichhe vote nei an tam zawk zel thin, kan thalai a bikin mipa zîngah ruihhlovin bu a khuar nasa a, hei hian nunna a suat nasa em em a ni," tiin, "Zirna-ah tan lak kan ngai a, All India Service leh Central Service-ah Mizo kan tling mang ta ngai lo va, kan office-ah thutlukna siam thei hnam dang mi an thahnem tawh em em a ni. Kan elpuite hi kan state chhûng ami chauhte ni lovin, state pawna hnam dangte el tur leh an aia thiam turin kan zir tur a ni. Kan zirna hian hlawhtlinna thlen thei khawpin kan taima tur a ni," tiin zirlaite a fuih a ni.

Sâpa chuan, "Mi taimate tan sawrkarin kawng a hawng mek a, mahnia intodelh duhte tan Bana Kaih Policy kan nei a, thawkrimte hlawhtlinna ram siam kan tum a ni. A thlawna dawn duhna rilru pu lovin, rinawm taka rul turte hnênah pawisa kan puk tir dawn a ni, Mizo-te hi kan thatchhe lova, kan thawh phu tawk hlawhtlinna a awm dawn chuan kan taima vek a ni. Thiamna leh zirna kan neihte eizawnna atana chhawr thiam turin thiamna tak tak kan zir chhuah a ngai a, thawhrimna tel lovin hlawtlinna a awm thei lo a ni," tiin, MZP General Assembly chhimtu zawng zawngte chu ram leh hnam tana mi tangkai ni turin a chah a ni.