Aizawl: Nimin khan MZP huaihawtin India sipaiten Jet Fighter hmanga Mizoram an bomb champha ‘Zoram Ni’ hman a ni a, Millennium Centre atanga Vanapa hall thleng kawng zawh a ni. Millennium bula inkhawm tawi buatsaih ah MZP President Lalsangzuala Ngente chuan thu sawiin, “Zoram Ni hi Political Party leh eng pawl mah tih thinurna atan leh tute tan maha rilru nat thar nana hun hmang kan ni lo a. Zofate tan inpumkhat lehzual nan te, kan tawrhna avangin thleng se kan tih avang leh kan ram hmangaih thar leh na Ni atan hmang kan ni,” a ti. Israel Point a thu sawitu MZP Adviser VL Krosshnehzova chuan, “Zoram Ni kan hman atang hian Zofate inkarah inlungrualna leh inunauna tha chhuak sela. Kan tawrhna avanga indawmkun mai lova, kan hmasawnna tur zawk ngaituaha Mizo mipui zawng zawng tanrual a tul a ni,” a ti. Vanapa Hall kawta thu sawitu Denghnuna chuan ram hmasawn zelna atan Zofate tanrual a pawimawh tih a sawi bawk. MZP chuan Jet fighter-in Mizoram a bomb champha, March 5 chu Zoram Ni tia vuahin kum 2008 atang khan kum tin he ni hi an hmang thin a ni.