Aizawl; MZP chuan hun hmasa lam atang tawha College Admission tih chhoh laia zirlai harsatna leh buaina tawk an awm thin chu pawi an tih thu an sawi. Nimina MZP thuchhuah chuan, zirlaite harsatna tawh thin tihkian nan ruahmanna felfai tak siam turin Mizoram sorkar an phut tih an sawi a. Mizorama college thenkhatin college-a lut tur zirlaite admission an lak danah mark hmuh ngai zat bithliah (cut-off mark) an siam thin chu tha lo an tih thu tarlangin, hetiang mark hmuh ngai zat bithliah (cut-off mark) lo siam thin college-te chu ti tawh lo tur leh zirlaite harsatna hrethiam a, zirlai zawng zawng ten admission an chan theuh theih nan rua hmanna siam turin zirna In thuneitute a ngen nghal bawk. HSLC 2014 pass chhuak thar thahnem takin pawl 11 admission tihna tur school an hmu lo niin MZP chuan an sawi bawk a. Heng zirlai passed chhuak thar, admission la hmu lo zawng zawng te chu admission an hmuh ngei theih nan hma an la dawn tih sawiin, HSLC passed thar admission la hmu lo zawng zawngte chu, May ni 21 ral hmaa MZP office-ah inhriattir turin an ngen nghal bawk.