ZALEN October 12, 2023 : Vawiin khan MZP General Headquarters Executive Meeting vawi 623-na neih a ni a. Hnamdang pasal nei MLA Candidate a dah chungchang, Mizo hming hawha hnamdang sumdawng chungchang, Manipur Zofate harsatna tawh chungchang leh pawl chhung thil pawimawh te an rel. Meeting hi H. Lalthianghlima President-in a kaihhruai.

Meeting chuan, Mizoram rorelna sang ber Assembly House-a thu tur MLA inthlanna lo awm turah Mizo Hmeichhia hnamdang pasal nei candidate tura dah tumna awm chu pawi an ti a. MZP-in political party tinte hnamdang pasal neite Candidate-a dah lo tura a ngen tawh chungin awmzia a nei tawklo in a hria a. Mizoram leh hnam a him zel theih nan a tawp thlengin hmalak zel nise tia rel a ni.

Meeting hian Mizoram chhungah Mizo hming hawha hnamdang sumdawng tam tak an awm leh an huangtau chho zel chu pawi a ti a. ILP kalpui danah pawh a sponsor-tu ten dan an zawm tawk lo leh hnamdang thlavang hauhtu an pung zel chu ram leh hnam tan a him loin a hria. Mizo hming hawha hnamdang sumdawngte dapchhuah hi a tul anga hmalak nise tih a ni.

Manipur buaina avanga harsatna hrang hrang pawh ngaihtuahin, an harsatna tawh hrang hrangah a tul anga puih a, a bik takin Zirlaite tawrhna hi theih ang anga tanpui nise tih a ni bawk.

Kum 2023-2024 chhunga MZP General Headquarters Appointed Secretary atan heng a hnuaia mite hi meeting chuan a ruat.

1. PS Muana Secy. i/c Organisation

2. Zonunmawia Ralte Secy. i/c Information

3. SB Ngoliankima Secy. i/c Social & Culture

4. Sandy Lalchhuangliana Secy. i/c Establishment

5. Lalsawia Secy. i/c Property & Library

6. Moses Vanlalsawma Secy. i/c Sports & Adventure

7. Bonny Lalthahluana Secy. i/c Education

8. C. Lalrosanga Secy. i/c Publicity

9. David Lalromawia Editor, MZP Chanchinbu