October 19, 2023; Mizo Zirlai Pawl (MZP) president H Lalthianghlima'n Mizo hmeichhia hnam dang pasal nei MLA candidate a dah lo tura party te an lo ngen tawhna chu an dinna a la tih thu leh vawiin atanga hma an lak chhoh tan dawn thu ZALEN a hrilh.

Zawhna chhangin MZP president chuan, hnam dang pasal nei MLA candidate a dah chungchang-ah MZP in hma a la chho tan dawn tih sawiin, vawiin atanga hmalakna an kalpui tan tur thute, an kal chhoh zel dan tur pawh meeting a an la ngaihtuah dawn thu te a sawi.

Tunhnai a thuthar thehdarhtute nen an inkawmna ah H Lalthianghlima chuan, "Mizo hmeichhia, hnam dang pasal neite hi Mizorama an awm hian an hnawk kan ti hran lo, amaherawhchu, kan rorelna sang bera an awm tur erawh kan ngai ngam lo a, MZP thil tum zinga mi a nih tel avangin hetiang hi kan ti lo thei lo. Party-te'n candidate atana an dah tlang a nih chuan an tlak ngei theih nan hma kan la dawn a, hmalak dan tur chu Executive Committee-in a ngaihtuah zel ang," a ti.

MZP President chuan, Law & Judicial department-in Mizo hnam dan 'The Mizo Customary Law' a tihchhuah bung 3:74-ah, 'Mizo hmeichhiain hnam dang pasal a neih chuan hnam dang chhungkuaah a luta ngaih a ni' tih a nih thu a sawi a, "Mizo hmeichhia, hnam dang neite chu hnam dang chhungkuaah a ngai nghet tlat a, Mizo mipui aiawha ram rorelna sang bera thu turin a pawm thei lo a ni," a ti bawk.