ZALEN September 30, 2025: Vawiin khan MZP General Headquarters, Aizawl chuan MZP Conference Hall-ah Executive meeting vawi 647-na (2025-2027 term-ah vawi khat na) neiin an thukhawm a, Sairang rail station tlawh chungchang, Inner line Permit (ILP) check chungchang, Student Aid Fund siam chungchang leh Pawl chhung thil pawimawh hrang hrang a rel. Meeting hi President, Dr. C. Lalremruata'n chuan a kaihruai.

Executive Meeting chuan, Sairang Rail station-a hnamdang lo luh dan endika tlawh thuai nise tiin a rel a, ILP pawh Aizawl khawpui chhungah, hun remchang hmasa berah check nise tiin a rel a. ILP pek chhuah a nih dan leh ILP hman danah te thil fel tawk lo tam tak a awm niin Meeting chuan a hria a, zirchianna neih ngei nise tiin a rel bawk.

Meeting chuan, Zirlai harsate tanpuina tur Students' Aid Fund pawh a rang lama siam nise tiin a rel a, Student Aid Fund Rules leh Guidelines mumal tak siam a nih hunah zirlaiten an hman tangkai theih tura dil theih turin chhawpchhuah an rel.

Meeting chuan, International Trade Expo Aizawl a neih tur chungchang a ngaihtuah a, Mizoram Merchant Association (MIMA) te nen pawha Joint meeting neih ho tawh niin, Mizo mipuite’n helai hmuna hnamdang rawn sumdawngte dawr lo tur leh hnamdang hnenah, sumdawnna atana hming hawh tir lo turin MZP chuan mizo mipuite a ngen nawn tak meuh meuh a ni.

Heng bakah hian MZP in a kum tin a lo buatsaih thin, Inter Higher Secondary School Volleyball Tournament chu October ni 14 - 17, 2025 chhung hian neih turin a rel a, kum 2010 atanga buatsaih thin, Inter High School Quiz 2025 pawh neih leh ngei nise tiin an rel bawk. MZP chuan, he inelna an buatsaih turah hian School zawng zawngte lo tel vek turin an sawm a ni.

MZP President Dr. C. Lalremruata chuan, “MZP hruaitu hlui zawng zawngte MZP office a lo let leh turin a sawm a, MZP hruaitu ni mek te min finchhuah a, Ram leh Hnam, Zirlaite tana ke kan penna kawngah, in mi tawiawmna kan mamawh tak zet a ni,” a ti.  

Meeting chuan kum 2025-2026 term chhung atan a Appointed Secretary tur a ruat nghal a, heng mite hi an ni:-

1. PS Muana, Secy i/c Organisation

2. Zonunmawia Ralte, Secy i/c External Affairs

3. H. T Lalrinmawia, Secy i/c Social & Culture

4. Moses Vanlalsawma, Secy i/c Publicity

5. Lalramenga Ralte, Secy i/c Education 

6. Lalremhlua, Secy i/c Information

7. Emmanuel Lalmalsawma, Secy i/c Property & Library 

8. Lalrinthanga, Secy i/c Higher Education

9. Johny K. Lalmuanzuala, Secy i/c Establishment 

10. Malsawmzela, Secy i/c Sports & Adventure 

11. R. Lalzarmawia, MZP Chanchinbu Editor