Aizawl April 12, 2024 : Vawiin tlai dar 4:30 khan MZP General Headquarters chuan Executive Emergency Meeting a ko a. MPSC Chairman bang tura MZP ngennain awmzia a neih loh avangin hmalak zel dan tur a rel.

MZP chuan ni March 27, 2024 khan MPSC hnuaia Combine Competitive Examination lak hnuhnung berah, answer paper leh mark tabulation-ah mark thenkhat thaichhiat leh correction fluid nasa taka hman a nih avangin thuchhuah a lo siam tawh a.

April 3, 2024 a MZP Executive Meeting thukhawm chuan, heng buaina zawng zawng avangin MPSC Chairman JC Ramthanga IAS (Retd.) chu mawh laa bang turin a lo ngen tawh a. April 10, 2024 (Nilaini) a MZP Press Conference chuan April 12, 2024 ral hmaa bang turin a ngen nawn a.

Vawiin April 12, 2024 (Zirtawpni) tlai dar 5 thlenga a la ban loh avangin, April 15, 2024 (Thawhtanni) atangin MPSC Chairman pisa kai tur dan nise tiin Emergency Meeting-in a rel a ni.

MZP chuan Combine Competitive Examination bakah, Food & Civil Supply Department hnuaia thawk tur Inspector of Supply MPSC-in a lak mekah, MPS a tling tawh pakhat chu Interview turin a ko tel mauh mai chu mak an ti.

Heng bakah pawh, Jr. Grade of Mizoram Forest Service (Asst. Conservator of Forest) post 3 lak turah, Examination neih vek tawh a ni a. Chutih laiin April 10, 2024 a MPSC thuchhuah chuan an qualification Department-in a pawm loh chhuanlamin Answer paper an endik dawn loh thu a tarlang a. Thalai hna zawng mek tam takte inbuatsaihna a thlawn hi MZP chuan pawi an ti.

MZP chuan Mizoram mipuite thlawpna an ngen.