ZALEN August 31, 2026 : MZP rorelna sangber dawttu Federal Council vawi 61-na (2025-27 termah vawi 2-na) chu vawiin khan MZP Conference Hall-ah neih a ni a, Federal Council palai 52 kalin, Vice President Sanghmingthanga, chu Chairman a ni a, Treasurer Rothanliana chu Vice Chairman niin President Dr. C. Lalremruata chu House Leader a ni.

House Leader Dr. C. Lalremruata chuan House Address neiin, "Special Intensive Revision (SIR), Election Commission of India (ECI)-in a kalpui mek chungchangah, MZP chuan SIR 2005–2026 Electoral Roll inkara Chakma punna chu zirchiangin, ECI-in Final Roll a tihchhuah thlengin a enzui zel dawn a ni," a ti.

President chuan, "Mizoram-a Central Institution hrang hrangah fello taka hnathawk tur lak tumna a awm thin chu MZP chuan a dem tak zet a, hetiang thil hi Mizoram-ah a thlen a phal ngai dawn lova, a do zel dawn a ni. Tun hnaia NIT Mizoram Registrar lak tur Advertisement kal mek-ah fello taka hnalak a awm loh nan MZP chuan ngun takin a enzui dawn a ni," a ti bawk.

MZP Federal Council vawi 61-na chuan a hnuaia tarlante hi MZP rorelna sangber Assembly ni September 23-25, 2026 chhunga Darlawn-a neih turah Agenda atan lungrual takin an pawm a ni:- 

Zirna kaihhnawih:-

1) Mizoram sawrkar enkawl College hrang hrangten a an mamawh Bus an neih theih nan Sawrkarin hma la rawh se.

2) CUET, NEET leh All India Competitive Exam-ah Mizo zirlaite'n Exam centre chungchângah harsatna an tawh thin avângin, Mizoram-ah CBT Exam Centre dah belh a nih theih nan hmalak ni rawh se.

3) Zofate kan inpumkhat leh zual theih nan, Sikul zirlaibu-ah mizo hnam hrang hrangte chanchin telh a nih theih nan, MZP in hma la rawh se.

4) Mizo thalai leh zirlaite tan Career Awareness Campaign leh Nationalism Campaign a tam thei ang ber MZP in buatsaih rawh se.

5) Zirlaibu-ah Mizo tawng dik tak hman anih theih nan, a tul angin hmalak ni rawh se

6) Zirlaiten ruihhlo hman sual a hlauhawmzia an hriat theih nan MZP in nasa zawkin Drugs Awareness Campaign buatsaih rawh se.

Ram leh hnam kaihhnawih:-

7) Kaladan Multi-Modal Transit Transport Project (KMTTP) -in kan ram leh hnam tana nghawng a neih theih dan zirchiana, hmalak ni rawh se.

8) Mizoram ramri dik tak humhalh a nih theih nan Sawrkarin hma la rawh se.

9) "The Mizo Marriage and Inheritance of Property

(Amendment) Act, 2026" khauh taka ken kawh a,

hnamdang thlah ten Scheduled Tribe (ST) chanvo an chuh ve loh nan hmalak ni rawh se.

10) Mizoram luhka hmun hrang hrangah mi tupawh ILP check an nih theih nan, MZP in hma la rawh se.

11) Mizo hming hawha hnamdang sumdawn tirte na taka hremna dan Sawrkarin siam se, a tul anga dap chhuah thin ni rawh se.