ZALEN August 14, 2026 : Mizo Zirlai Pawl (MZP) General Headquarters chuan vawiin khan executive meeting neiin, Mizoram chhunga zirna in zawng zawngah 'Vande Mataram' sak chhuah emaw, ngaihthlak tir emaw, tura tihluihna awm chu an duh loh thu an sawi.

Ministry of Home Affairs (MHA) chuan India National Song "Vande Mataram" hi India ram chhunga zirna in zawng zawnga sak chhuah ngei tur thupek a chhuah a. MZP chuan he thupek chungchangah hian March 9, 2026 khan press conference lo nei tawhin, an dinna ngaiah an la din reng thu an sawi nawn leh a ni.

MZP chuan, "Zirna in chu thiamna zirna hmun tur a nih avangin political thil aiawhta atana hman tur a ni lo," a ti a. Mizoram chhunga zirna in hrang hrangah tihluihna hmanga 'Vande Mataram' sak tirna a thlen lohna tura hma la zui zel turin thutlukna an siam a ni.

Meeting-ah hian kum 2015 atanga September ni 2 apianga lo hman tawh thin "Hnamdang Nupui Pasal Neilo Tura Inzirtirna Ni" chu kumin 2026 pawh hian a hma anga chhunzawm leh turin an rel.

Mizoram hnam hla (Official State Song) atan Rokunga phuah 'Ro Min Rel Sak Ang Che' tih hla chu Council of Ministers (Cabinet) thukhawmin an pawm tak avangin lawmawm an tih thu an sawi bawk.