Aizawl: Mizo Zirlai Pawl (MZP) chuan Mizoram hmun hrang hranga school zirtirtu chu a inkhairual lo hle nia sawiin zirtirtu semrual hna thawk turin sawrkar an phut tih an sawi. Nimin khan Aizawl Press Club-ah thuthar lakhawmtute kawmin MZP President L.Ramdinliana Renthlei chuan, “The Right of Children to Free and Compulsary Education(RTE) Act, 2009-ah chuan Pupil Teacher Ratio (zirtirtu pakhat in naupang a zirtir tur zat) hi Primary-ah 30:1 a ni a, Upper Primary (Middle School)-ah 35:1, Secondary level-ah 30:1 a ni a. Mizoramah chuan Pupil Teacher Ratio(PTR) hi Primary school-ah 18:1 a ni a, Upper Primary(Middle School)-ah 9:1 a ni a, High School-ah 8:1 leh Higher Secondary School-ah 14:1 a ni thung a. Zirtirtu hi an tam tawk a, tuna kan harsatna hi chu thingtlang lamah an tlem a, khawpuiah an tam thung a, hei hi MZP chuan semrual a ngai kan ti a ni,” a ti. MZP President chuan an zirchianna ah Aizawl-a sawrkar enkawl Primary school thenkhat ah chuan zirlai awm tam lutuk lohnaah pawh zirtirtu 10 te, 8 te an awm nia sawiin hetih lai hian thingtlang lamah erawh chuan zirtirtu 1 te, 2 chauhten an enkawl a awm nia sawiin an indaih lo hle tih a sawi a. Zirtirtu sem rual tura hma an laknaah hian thuneitute tumah inrawlh lo turin an ngen tih a sawi bawk. MZP President chuan zirtirtu tura lak ni si, School Education Department Office hrang hranga awm (attach) an thahnem hle tih sawiin an awmna hmuna awm turin an ngen tih a sawi a. Hei bakah hian zirtirtu lak thar thingtlang lama post-ten an thiltihtheihna hmangin transfer an dil thin niin a sawi bawk a, hei hi MZP chuan tha lo a tih thu a sawi bawk.