ZALEN January 16, 2026: MZP General Headquarters leh Zo Reunification Organisation General Headquarters buatsaih-in vawiin khan Vanapa Hall kawtah “Border Fencing duh lohna punkhawm” buatsaih a ni a. MZP President Dr. C Lalremruata leh ZoRO President Sangkawia ten thu an sawi a. Border Fencing duh lohna thu an au rual bawk.

MZP President Dr. C Lalremruata chuan; "India sawrkarin, an ram buaina avanga Myanmar atanga rawn lutte chhuanlama, Mizoram ram tha lai zawng zawngah ramri hung a tum hi kan hrethiam thei lo. Ramri hi mihring siam chawp mai a ni a, Pathianin Zofate ram leh hnam min din sak a, Zofate ram rorelna pakhat hnuaia awm kan duh mek laia, Zofate chenna ram insi reng, thendarh a daidanna bang siam a ni tur hi kan pawm thei lo a ni. India sawrkar pawhin kan duhna hriain an hmalakna thulh nghal turin kan ngen a ni” a ti. 

ZoRO President R. Sangkawia pawhin, "Zoram hi ka ram a ni a, Zofate hian mawhphurhna sang tak kan nei a ni. Chuvangin, thendarh nih kan duh lova. Zofate rorelna pakhat hnuaia awm hi kan hmathlir leh chanvo a ni. United Nation Declaration on the Rights of Indigenous People’s (UNDRIP) pawhin, hnam khat unau zalen taka in kalpawh a remtih laia hetia thendarh tuma hmalakna hi pawm harsa kan ti a ni,” a ti.

R. Sangkawia chuan Border Fencing hi rilru leh taksaa unau inthen hlenna tur a nih avangin an duh lo a. Ramri hung hian ruihhlo a harsatna a sutkian a rinawm loh a, buaina tawh tur nen a man lo hle ang a ti bawk. 

ZoRO President chuan, Mizoram state sawrkar-in, ni 28 February, 2024 khan Border Fencing duh lohna official resolution a siam a. Hei hi vawiin thlengin thiah a la ni lova, kengkawh zel turin sawrkar a ngen a, an thlawp tlat dawn a ni a ti bawk. 

MZP leh ZORO chuan vawiin tlai vek khan, India Prime Minister Narendra Modi hnenah Border Fencing ngaihtuah nawn tura ngenna lehkha Mizoram Governor kaltlangin a thehlut a. A copy hi Union Home Minister a pe bawk.