ZALEN August 27, 2026 : Mizo Zirlai Pawl (MZP) General Headquarters, Aizawl Executive Meeting vawi 61- na chu vawiin (Nilaini) khan MZP Conference Hall-ah neih a ni a, Meeting-ah hian Tlabung khaw chungchang leh Supreme Court-a The Mizo Marriage & Inheritance of Property Act, 2026 khin chungchang te pawh a tel.

Meeting hi MZP President Dr. C. Lalremruata'n a kaihruai a, MZP Rorelna sang ber dawttu, MZP Federal Council vawi 61na Agenda chungchang, "Hnamdang nupui/ pasal neilo tura inzirtirna ni" hman dan tur chungchang, Teachers' Day chungchang leh pawl chhung thil pawimawh hrang hrang rel a ni.

Meeting chuan, MZP-in a kum 2015 atanga Sept ni 2 apianga a lo hman thin, "Hnamdang nupui/ pasal neilo tura inzirtirna ni" chu kumin pawh hian hman leh nise, School hrang hrangah thusawina hun hman leh nise tih a ni. "Zirtirtute Ni" Teachers' Day pawh MZ- in kumtin a a tih thin angin, Zirtirtute zahna thuziak Aizawl chhung hmun hrang hrangah tar leh nise tiin a rel bawk.

Meeting chuan, Tlabung khua chu hmanlai aṭanga tun thlengin Mizote khua a ni tih an tarlang a, Tlabung chu Chakma-te khaw hlun leh an lo luahlum tawh ṭhin anga sawi awm chu MZP chuan a pawmlo a, thangtharte rilrua history dik lo tuh tumna leh Mizoram mipui zahlohna ah a ngai a. Mizo Lalte'n an ram leh an ram luah chinte an humhalh nasat em avangin, eng ti kawng mahin Tlabung chu Chakmate khua a ni thei ngailo a ni, an ti.

Meeting chuan tun hnaia Mizo hnam dan, The Mizo Marriage & Inheritance of Property Act, 2026 Supreme Court hial a khing duh tu Mizo Nu ni thin, hnamdang pasal nei ta chu a dem a. Kum 2015 atang khan MZP chuan hnamdang nupui pasal neilo tura inzirtirna a lo hmang tawh thin a, Kum 2023 MLA election dawnah pawh Political party tin te hnamdang pasal nei ticket pelo turin a lo ngen tawh a, tuna Supreme Court-a khingtu hi Political party pakhatin MZP te ngenna zahlo in ticket an pek luih avangin Aizawl khawchhungah kawngzawh pawh MZP hian a lo buatsaih tawh a ni. Hnamdang pasal neite chungchangah hian MZP chu a ngaihdan a la ngai reng a, Political party hrang hrangte pawh heng mite hi eng inthlanah pawh theh chhuaklo turin a ngen nawn leh bawk a ni.

MZP rorelna sang ber dawttu Federal council vawi 61-na August ni 31, 2026 (Thawhtanni) a neih tur Agenda thlitfim nghal a ni.