October 15, 2023; Mizo Zirlai Pawl (MZP) president kal chhuak ta Lalnunmawia Pautu chuan MNF party a zawm dawn a, a rualin Serchhip MZP President leh Hnahthial MZP President ten MNF an zawm bawk ang.

ZALEN thudawn danin, Ex MZP president Lalnunmawia Pautu hi naktuk Mizo Hnam Run inkhawmah chief minister leh MNF party president ni bawk Zoramthanga'n MNF party ah a lawmlut ang.

Lalnunmawia Pautu hi MZP Gen. Hqrs. ah OB post hrang hrang chelh tawh niin, kum 2021-2023 chhungin president a ni.

OB post dang leh president a nih chhungin ram leh hnam humhalhna leh zirlaite tan a hmalakna kawngah a thawh hlawk hle a, raltlante tuamhlawm a, an tana ke pen sakna kawng a fak hlawh tak a ni.

President a nih lai, tunhnai Manipur buaina thlen tirh lai vel khan Manipur atang ngei a Mizo zirlai tangkhang hruaichhuaktu a ni a.

Heng bakah hian Myanmar buaina chungchang a Zohnahthlakte thlavang hauh leh tuamhlawmna kawng a tha a thawh hlawk avangin, tunhnai khan USA atanga sawmna a dawn angin, thusawina te pawh nei pha hial khawp a, Zofate inpumkhatna lam ngaipawimawh mi a ni.

MZP President a nih chhungin Delhi ah UPSC coaching zirlai 2 engkim tum sakin an dah a, tunah hian an la enkawl mek a, heng bakah hian MZP, ICT Dept leh NEILIT tangkawp in a free in MZP office ah a thlawn vekin zirlaite tan computer zirna an hawng a, hei pawh hi la chhunzawm zel a ni.

A president term tantirh atangin MZP trust fund an siam a, zirlai school fees, in luah man leh exam fees nei lo te, tanpuingai engemaw zat an tanpui a, zirlai beng tha lo mi engemawzat bengdar an lei sak bawk.