ZALEN October 3, 2023 : MZP President thar H. Lalthianghlima chuan Ram leh Hnam leh Zirlaite tana tha turah chuan huai takin an kal dawn a, chumi kawngah thurawn eng pawh an dawnsawn theih tur thu a sawi. Kumtina State Service (MCS) lak thin chu khat deuh zawk emaw tum khatah tlemte tea la turin Mizoram sawrkar a ngen.

Vawiin September 3, 2023 (Thawhlehni) chawhnu khan MZP General Headquarters Pisapui-ah hruaitu hlui leh thar te mawhphurna an inhlannaah MZP President chuan, “Kan Mizo hmeichhia ten hnam dang pasal an nei hi tha kan tih loh thu nasa takin kan tlangaupui thin a. Chutiang a hnamdang kawppui neite’n tunhnaiah ram rorelna sang Assembly House-ah thut tumin hma an la hi pawi kan ti a, kan ram leh hnam him nan theihtawp-in kan dodal dawn a. Hnamdang kawppui neite pawhin, Mizo hnam hmangaih avangin ram rorelna sang ber-ah hmun chan tum kher lo turin kan ngen a ni” a ti.

MZP President thar chuan, “Mi thenkhat hnam aiawh an ni tih pawh kan hriat loh ten, hnam aiawh ang maiin hmun hrang hrangah thu an sawi thin hi pawi kan ti a. Ram leh Hnam thil kan sawi dawn a nih pawhin, fimkhur tlang turin mitin kan duh a ni.” a ti a. “Mizo thalaite All India Service leh Central Service-a tling kan tlem em em chhan chu kumtin State Service lak a nih thin vang a ni pakhat a. Kumtina State Service (MCS) lak thin hi, khat deuh zawk emaw tum khatah tlemte tea la turin Mizoram sawrkar kan ngen a ni,” a ti bawk.

Mawhphurna inhlanna hunah hian, President kal chhuak Lalnunmawia Pautu-in thu sawiin, Zirlaite leh ram leh hnam tan hruaitu tharte ke pen zel tura a duh thu a sawi a. Pawl hmalakna kal mek tha lai te chhunzawm a, Zofate thlavang na taka hauh zel turin hruaitu tharte a fuih. MZP President kalchhuak tur chuan, MZP hruaitu tharte duhsakna a hlan a. MZP Election Commission leh Organising Committee-te thawhrimna a fak bawk.

MZP General Headquarters kum 2023-2025 chhung hruaitu atana thlan, mawhphurhna la thar te chu:-

President : H. Lalthianghlima

Vice President : C. Lalremruata

General Secretary : Chinkhanmanga Thomte

Asst. Gen. Secretary : C. Lalhmingsanga

Treasurer : Zairemthanga

Fin. Secretary : Rothanliana