Aizawl; Nimin khan I&PR Auditorium ah MZP buatsaih Inter High School Quiz 2014 khuhhawnna neih a ni a. He hunah hian Pu KS. Thanga, Parliamentary Secretary Finance department chu khuallian a ni a. Quiz-a tel tur school hrang hrang 21 ten an awmna group tur te pawtin fixture draw neih nghal a ni. MZP Inter High School Quiz hi kum 2010 neih tan niin, kumin 2014 hi a tum nga na a ni. Quiz khuhhawna a khuallian Par.secy.KS Thanga chuan,"Kan ram hian Central leh State atanga sum kan hmuh zawng zawng chanve aia tam mah sawrkar hnathawk hlawhah a kal avangin development atan hian sum a kal hnem thei lova, hei hi sawrkar pawh hian veiin insiamrem a tum hle a ni," a ti. Thusawitu dang Lalsangzuala Ngente, MZP Vice President chuan, "Zirlai ten lehkha kan zir chhan kan hriat a tha a, keimahni tan baka ram leh hnam tana zir kan ni tih kan hriat a tha a ni,” a ti MZP Inter High School Quiz hi November ni 4-12, 2014 chhungin Ignite Studio Khatla ah neih thin tur a ni a, zan dar 8 ah ZONET Cable Television hmangin tihchhuah thin a ni dawn a ni.