Aizawl: Nimin khan Mizoram Bharatya Janata Party (BJP) Office, Tuikhuahtlangah MZP hruaitute leh BJP Mizoram hruaitute an inkawm a, MZP hruaitute hian BJP party-in ramri chungchang, Education, Chakma Foreigners chungchang leh Lokayukta chungchanga hmalak an tum dan leh hmachhawpte an zawt a ni.   MZP President L. Ramdinliana Renthlei-in Mizoram leh state dangte inrina chungchanga BJP Party hmalakna chungchang a zawhna chhangin BJP hruaitute chuan Mizoram leh State dang inrina mai bakah International boundary zawng zawngah BJP chuan sipai tam tak dah an tum tih sawiin Mizoram leh Assam ramri bik chu Mizoramah BJP-in sawrkarna an siam theih chuan rang taka sawi fel nghal theih an beisei tih an sawi a. MZP-in Zofate Chawlhbuk sak an tum chu BJP in theihtawp a puih an tum tih an hrilh a ni.   Education chung changah BJP hruaitute chuan Mizoram School Education Department chu nasa taka thuam that a ngai tih sawiin, “Union Public Service Commission a zirlaite tun aia tam thei ang ber kan inziah tlin theih nan BJP chuan hmalak a tum bakah Cadre hran kan neih theih nan hmalak kan tum a ni,’’ an ti a. Chakma Foreigners chungchangah BJP a sawrkar chuan Foreigners dap chhuahna atana pawimawh em em mai Citizen Identification hman an tum niin an sawi. Lokayukta chungchangah BJP Party hruaitute chuan sawrkarna an chan chuan Mizoramah Lokayukta hman nghal a ni dawn niin an sawi bawk.   MZP chuan ni 13.11.2018 (Thawhlehni) chawhnu dar 1:00 hian Mizoram Pradesh Congress Committee(MPCC) hruaitute nen Party Office ah an hmalak tumnate zawtin kawm leh an tum a ni.