ZALEN November 16, 2024 : Vawiin khan MZP General Headquarters chuan MZP Conference Hall-ah tun hnaia Manipur zohnahthlak mi 10 te Central Reserve Police Force(CRPF) ten Jiribam District-a an kah hlum leh a hnu lam thil kal zel chungchangah Emergency meeting a ko.

Meeting hi President H. Lalthianghlima'n a kaihruai a, he thil thleng leh a hnu lam thil kal zel; post-mortem tih khawtlai, chumi hnua an ruang pek chhuah tih khawtlai a, Zofate duh dan ngai pawimawh miah lo a helicopter-a ruang han dah tura Manipur state leh India sawrkar hmalakna chu a lawmawm loh hle in a hria a, an kah hlum tawh hnuah pawh an duh anga ruang pawh an buaipui a rem lo hi MZP chu a lungawi lo tak zet a ni.

Mizoram mipui lungawi loh leh thinrimna inmung mek ngaihtuahin, Meitei tan hian tute emaw insum zo lo kut tawrh mai theihna MZP chuan a awm niin a hria a, MZP chuan, Mizoram sawrkar chu Meitei te sahimna ngaihtuah turin a ngen a, Mizoram chhunga Meitei awm te pawh fimkhur turin a chah a ni.

Hetih rual hian, Manipur state khawpui Imphal-ah pawh Mizoram atanga lehkha zir a awm te’n Meitei kut an tawrh loh nana hma la turin MZP chuan India sawrkar a phut a ni. MZP chuan Manipur sawrkar hi a ring lo a, Mizoram atanga zirlaite himna chungchangah pawh Manipur ni lova India sawrkar hmalakna hi a beiseiin a phut tlat a ni. Mizoram atanga Imphal-a zirlai awmte himna atana hmalak a nih loh a, tuar an awm a nih chuan MZP chuan a ngai thutak hle ang.

Tin, he buainaah hian Mizoram hi a ralbang thei ngai dawn lo va, chuvangin Manipur sawrkarin Meitei firfiakte a khuahkhirh theih hma chu an state-a science leh technical institution hrang hranga Mizoram seat-te hi institution dangah behtir rih turin MZP chuan India sawrkar hi a phutin a ngen nghal bawk a ni.

Manipur-a Zofate tawrhna hi MZP chuan a hriain a ngaihven reng a, an nat angin a na reng a ni.