ZALEN July 22, 2026 : MZP chuan thuchhuah siamin naktuk July ni 23, 2026 (Ningani) chawhma dar 11:00 ah hian Vanapa Hall kawtah, NEET (UG) 2026 question leak avanga harsatna hrang hrang thleng mek leh zirna kalphung fel fai zawk a awm theihna turte, exam system thianghlim zawk a awm theihna tur leh zirlai rilru thianghlim tak tak te harsatna tawk an awm tawh loh nan Peaceful Protest neih an tum thu an sawi.

MZP General Headquarters chuan naktuka NEET (UG) 2026 question leak avanga harsatna hrang hrang thleng mekah Peaceful Protest an neih turah zirlai, mipui zirna ngaipawimawh, dikna duh zawng zawngte tel vek turin an sawm.

MZP chuan Aizawl khawpui chhunga College zirlai, Higher Secondary School zirlai, High School zirlai, NEET Aspirant leh Education Institution hrang hranga zirlaite, Hnampual Zirlai Pawl leh zirna ngaipawimawhtute zawng zawng telpui turin an sawm tak meuh meuh a ni.

Peaceful Protest-a zirlai kal tur ten school uniform ha loin mahni remchan dan anga Vanapa Hall pan khawm mai tur leh heta tel avanga zirlai harsatna nei an awm a nih chuan MZP General Headquarters-in a tul angin an buaipui tur thu an thuchhuahah an tarlang.

Vawiinah khan pawl tan chhan nei lo, Mizorama zirlaite chuan Delhi-a an zirlaipui leh thalaipuiten lungawi lohna an lantirna leh an thlawpzia lantir nan peaceful demonstration an lo nei tawh bawk a ni.