ZALEN Oct. 8, 2024; Lalrinpuia Sailo (41) S/o Ngurchhuana (L), N. Serzawl khua chu an khawkianga Phunglui tui khuahah a tla hlum.

Lalrinpuia hi Pathianni zan inkhawm hlan a pawn chhuak chu hmuhzui a ni ta lova. A tuk Thawhtanni ah a chhungte hmun danga awmte biak kual a nih hnuah an hnena a awm loh avangin khawtlang mi tlawmngaiten an zawng a. N. Serzawl khaw chawmtu tura tuikhuah, N. Serzawl khaw kiang lawka awm Phunglui tui khuah chu mitlawmngaiten mau sei tak hmangin an dap a, he tah hian a ruang ni awm tak dap fuh niin Thawhtanni chhun dar 1 ah lak chhuah a ni ta a ni.

Thudawn danin Lalrinpuia tlakna tuikhuah hi fur lai a nih avangin tui a tam hle a, a tlakna bawr vel hi ft. 20 vela thuk a ni bawk. Vawiin thawhlehni khan Darlawn CHC ah a ruang posmortem niin vawiin vek khan vuiliam a ni.

Lalrinpuia hi a nu leh pa in an boral tawh a, hun engemaw chen amaha a khawsak hnuin tun hnai khan a u khawdanga awmin a fin a. A nu leh pa unaute ngaia lungleng thin niin an sawi.

N. Serzawl khua hi Darlawn khaw kianga awm niin Darlawn atanga km 7 velah a awm a ni.