ZALEN January 10, 2025: N. Vanlaiphai Staff Welfare Committee te chuan thuchhuah siamin social media-a N. Vanlaiphai PHC-a thawktu hoin Advance Christmas an hman a, nilenga thawm ring tak nei anga sawi an nih chu dawt a nih thu an tarlang a. Hemi ni hian OPD pawh dar 1:00 PM thleng hawn a ni a. Advance Christmas program pawh dar 3:00 PM dawnah tan chauh niin an sawi. Hei bakah hian hrem ngai an awm a nih pawhin dan anga hremna pawh pe ngei turin an ngen bawk a ni.

N. Vanlaiphai PHC-a thawktute chuan Social media-a Refer mai tura an ngen hnu a refer chauh anga sawi pawh dawt a ni a. Damlo Kaprumi (80 yrs), Lungkawlh chu Dt. 3.12. 2025 (3:15 PM) ah admit a ni a. Duh anga hma a sawn chakloh avangin Advance Christmas Program tan hma in chawhma 10:00 AM ah an refer fel tawh a ni a, damlo attendant pawh hrilh an ni. Refer anih veleh hian kal nghal mai loin 9:30 PM ah damdawi in an chhuahsan chauh a. Hemi ni hian an kalchhuah theih hma zawng pawhin treatment a pangngai a kalpui vek a ni. Chawhnu lamah damlo hi buai tan anga sawi pawh thudik tawk lo a ni a. An kal dawn thlengin damlo vitals hi check a ni a, a tha vek niin an sawi.

Thawm tihzawih sak tura an ngen 'min run luih sauh bawk' a tih pawh hi PHC-a thawhktute chuan dawt a nih thu an sawi a. Damlo chu an venthawn avangin ward a bengchheng a luh loh nan tukverh leh kawngka te pawh khar sak a ni a, mahse damlo awmpuituten tukverh leh kawngka te chu an hawng leh thin a. Video an post pawh ruaitheh zawh inseng fel lai a ni a. An complaint avangin woofer hi an titawp nghal niin an thuchhuah chuan a tarlang.

Doctor chawpa rui anga sawi chu dawt niin damdawi inah hian zu an in ngaih loh thu leh kohhran rawngbawltu te pawh an zingah an awm tih an thuchhuah-ah hian an tarlang.

Hetianga damlo pawh dam taka a chhuah tawh hnuah social media a a chhe thei ang bera N. Vanlaiphai PHC doctor te leh staff-te dawt a puh an ni chu an rilru a na hle a. Thuneitute pawhin hetiang a dik lo taka social media a dawt a intihmualphona hi a awm tawh lohna turin thil awmdan diktak chhui chianga, hrem ngai an awm a nih pawh in dan anga hremna pawh pe ngei turin an ngen bawk a ni.