ZALEN January 27, 2026: North Vanlaiphai Welfare Aizawl chuan Richard Lalhmingliana, kum 27 N.Vanlaiphai khua vanduaithlak taka January 26, 2026 zing lama boral chungchangah kutthlaktu ni a rinhlelh H. Lalruatmawia, Chanmari West, Aizawl chu Mizoram Police-ten an man nghal thei chu lawmawm an ti.

North Vanlaiphai Welfare Aizawl he pawikhawihna leh thihna chungchang pawh hi chak taka an chhui chhuah thuai an beisei a, kutthlaktu hian a phu tawk hremna a hmuh ngei an phut bawk.

Video footage a kutthlaktu chet dan han en hian pawisak nei lo, nunrawng taka chetna niin North Vanlaiphai Welfare Aizawl chuan an ngai a, hetiang mi hi mi dangte tan pawha mi hlauhawm niin a lang. Chuvangin, hetianga tharum thawhna rapthlak tak hi a thlen tawh lohna turin kutthlaktu hi dan hmanga hrem ngei ni se an duh tih thuchhuah an siamah an tarlang.

North Vanlaiphai Welfare Aizawl chuan Richard Lalhmingliana kal san tak a chhungte kan tawrhpui tak zet a, an tawrhna te Pathianin a chhawk zangkhai ngei kan duhsak a ni.

He case-ah hian H. Lalruatmawia, Chanmari West hi Aizawl PS kutah a awm a, naktuk lamah court/jail ah a lut tur niin hriat a ni. Thu dawn dan chuan a case hi section 103(1) of BNS a ni. Amah hi BA, second semester zirlai a ni.