Aizawl: Na zawka leiba thinna tur ‘The Mizoram Demands Recovery Amendment Bill, 2018’ chu tun kar chhunga Assembly session lo awm turah putluh a, pass tum a ni. Zalen zawhna chhangin Finance Minister Lalsawta chuan, “The Mizoram Public Demands Recovery Act,2001 hi kan neihna a rei tawh a. He dan hnuaiah hian DC te chuan leiba hi an thinsak tur niin DC te hian Certificate Officer an ruat tur a ni a. Mahse, beisei a phak loh deuh avangin a siam thatna tur hi kan siam leh ta a ni,” a ti. Tun hnaia DC-ho an kohkhawmah pawh he dan chungchang hi an agenda pawimawh zingah an tel thu sawiin Finance Minister chuan, “Sawrkara sum lut tur tam tak lut lo a awm thin avangin he dan hi pass anih chuan sawrkarin a thatpui dawn a. A bikin Bank, Land Revenue & Settlement leh Taxation department-ten an hlawkpui zual dawn a ni,” a ti bawk.