DOWNLOAD OUR APP

Read latest news on your phone
app-store
Nabotha Grape huan
Aug 20, 2016
- Commissioner Lalkiamlova Israel lal Ahaba leh a nupui Jezebeli te chu an khawpui Samaria-ah an awm a. Jezreel khuaah Lal in pakhat an nei bawk a. Lal Ahaba chu Jezreel-a a lal inah chuan kalin a in bul mai a Nabotha grape huan chu a hmu a. Chutia a lal in bula mi dang huan awm chuan a mit a kap ta hle mai a. Lal in bula mi naranin huan a nei chu inhmehin a hre lo a ni mai thei e, Thlai huan atan ka duh tia chhuanlam siamin Nabotha hnenah chuan lal grape huan tha zawk hmun dang a mi nen inthleng a dil taa. Mahse Nabotha chuan Israelte thuthlung ang takin a thlahtute ro han tihral mai chu rem a lo tibik si lova (Deut 36:9). Ahaba hian awm lo tak chuan thil a ti mai bik hauh lo, Nabothan inthleng a remtih loh pawhin a man hu pawisaa pek pawh a in huam a ni. Mahse Nabotha hian Israelte dana pi leh pute ro tihral mai mai loh tur tih chu a lo changchawi ve tlat si a. Ahaba chu Samaria-ah a haw ta a, Naboth-an a huan inthleng a remtih loh avang leh lei pawh a remtih loh avangin a lungngai ta a. Chaw a ei duh lo va, khumah a mu ta reng mai a. A nupui fing vervek pangngai, Israel mi pawh ni ve hauh lo, Phoiniki rama Sidon lal Ethbaala fanu, khan fin vervek a thawh ta a. Lal a nih a chu thuneihna chanvo (a right) hrilhin, Israelte lal i ni lawm ni? engah nge khatia i awm vel ni, tho la, chaw ei la intiharh rawh. Nabotha grape huan chu keiman ka pe ang che” a ti ta ngat mai a (1Lalte 21: 7). A tih dan tur chu a hmu tlang rang mai. Lal lehkha angin lehkha a ziak a, lal seal a chhu thlap a, Jezreel khuaa roreltute hnenah lehkha chu a thawn a. Naboth-an Pathian leh lal a sawi chhia angin a ziak a. Chutianga an Pathian leh an lal sawichhiata an awm avanga lungngaia chaw nghei turin a hrilh a ni. Tichuan thil tisualtu chu zawng chhuak a, kawng zawhpuia mipui hmaah tar chhuak turin a hriattir a. Chutah ngei chuan Deuteronomy 17:6 thu ang taka a lo ruatsa mi pahnih Naboth-a hek a, Pathian leh lal a sawichhiat kan hria titu tur chu ruahman sa diam a. Chutia Naboth-a chu thil lian tham tak tisual anga mipui hmaah hruai chhuaka kawng an han zawhpui chuan, Lal nu Jezebelin vervek taka Naboth-a hektu tura a lo ruat sa mi pahnih te chu an lo chhuak a. “He mi hian Pathian leh kan lal a sawichhiat kan hria” an rawn ti ta a. Tichuan, (kum tam tak hnuah Isua chunga thleng ta ang chiah khan) ‘thi tlak a ni’ tiin khaw pawnah an hruai chhuak a, lungin an denghlum ta a ni. Chutia Naboth-a mi sual thiha a thih takah chuan lal Ahaban a ro a neihsak chu a thiang ta zan mai. Mi sual thiha thi lunga denhlum te ro chu lalin an khawmsak emaw an duh duhin an tihsak thin a. Isua khengbettuten a thawmhnaw an insem ang khan. Hei hi Mosia dan atanga tih ni lovin tradition anga an kalpui a ni, 2 Samuela 16: 4 en ila. Chung chu hriain lalnu vervek tak mai chuan a pasalin a duh em em Naboth-a grape huan neihsakna hmanruaah a hmang ta a nih chu. A remruatna ang ngei a Naboth-a lung a denhlum a ni tih a hriat chuan a pasal hnenah “Tho la Naboth-a grape huan chu zuk nei rawh le” a ti ta a ni. Lal Ahaba chu phur takin Naboth-a huan ro hlu tak mai neihsak tur chuan a kal ta a. A nupui plan vek a ni tho chungin hmanni lawka a neihsak theih loh; hetia rem chang awm ta mai hi a nih dan tak a hriat loh pawhin a nih dan tur awm chu a hre thiam ngei ang. Mahse chu lam chu zawtin, ‘E khai, chutianga dik lo taka neih chu tha ka ti lo ve’ a ti bik hauh lo va. Naboth-a huan neihsak tur chuan phur takin a kal a, mi sual thiha thi ro chu a khawm ta mai a ni. Tunlai pawh hian sawrkar hna thawk leh hmun dang a mi pawh dik taka tih tum an duh ang nei thei si lo; an nupuiten fing taka an tih kual vel avanga an duh chang thei ta te an awm nual mai awm asin. Kan nupa nun, kan chhungkaw nun hi kan in enfiah fo a ngai. Ka lalna office atanga ka tihluih theih, neih pawh ka duh, mawi lo takleh fel lo taka tih ka hreh si, ka nupui/pasalin a kawng hriaa fel lo leh dik lo dawn baksak lova keimah lang si lo va, a tih avanga ka neih tak te hi a lo awm ve reng lo maw. Eng maw ti tia tikuala mirethei te chanai chhuhsaktu sawrkar milian, lian lem lo leh mi hausa kan ram hian kan nei nual mai lo maw le? Kawppuite chauh ni lovin an laka tlaktlum beiseitute pawhin chutiang chuan an hotute tan remchang an siamsak thei bawk. Department hotute pawh hian Jezebeli ang mai hian an pu tethil awh hi an chhinchhiah a, neihtir dan rem chang an zawnsak ve fo a ni awm asin! Naboth-a suala puha tihlumtu te chu man chhuahin an awm a. An thiltih man chu a burin an khum ta. An thuruk hre lo mipuite chuan lal diklohna an hre reng reng lo vang. Mahse Pathian chu engkim hmutu leh hre vektu a nih avangin bum rual a ni si lo. Zawlnei Samuela chu Ahab-a hnenah ‘i thata i neihsak leh nghal a law?’ ti turin a tir a. Chu chauh chu ni lovin, ‘Uiin Naboth-a thisen an liahna hmun ngeiah hian nanga thisen pawh an la liak dawn a ni’ a ti a ni (1Lalte 21: 19). Pathian thu tan chhana tih, dik awm taka lang, dik si lo a awm. Mi felte thisen chhuak hi Lalpan a hmu a; mi felte tuarna phuba hi a la ngei ngei thin a, a la zel bawk ang. ‘A vawtuin ek a cheh’ tih ang maiin tunlai thleng pawh hian mi dangte suala puhtu, sual lo suala puhtute sual thup, phiarrukna tenawm tak chu hmuh chhuahin a awm zel dawn. Mahni thil tihsual thup nana mi dangte dik lova puhtu te pawh, Man chhuaha hremin an awm zel ang. Mipui bum thei mah ila Lalpa chu bum rual a ni lo ve. Chuvangin kan thil duh neih kan tum dan te hi a dik em? a thianghlim em?mi ngaihah ni lovin Lalpa ngaihin a fel em? tih i chhut fo ang u. Naboth-a grape huan chhuhsaktu kan lo ni ve dah ang e, i fimkhur tlang teh ang u khai.
MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh