World No. 1 Novak Djokovic chuan hun rei tak a lo elpui tawh, Rafael Nadal chu hliam avangin kum khat dawn inkhel tawh lo mah se thla thara Australian Open-ah a la hlauhawm tho dawn niin a sawi.

Spaniard kum 37 mi hian Grand Slam nomawi vawi 22 zet a la tawh a, tun kar tawpah hian kum khat dawn hnuah Brisbane a inkhel veleh tan dawn.

A inkhelh hnuhnung ber chu January thlaa Australian Open second-round-a American Mackenzie McDonald laka a tlawm kha a ni daih tawh a ni.

Kum 2024-ah hian January 14 atangin Melbourne-a inelna sang hi tan a ni ang.

“Nadal-a hi a tha thei ang berin a khel leh ang tih ka ring tlat a ni,” tiin kum 36 mi, kumina Grand Slam pathum laa lak tam lama Nadal khuma 24 la tling ta, Djokovic-a chuan a sawi.

“Vawi tam tak kan lo ring lo tawh thin a, kei ngei pawh ka tel thin a; mahse, kan dik lo tih a rawn tilang ziah.

“Inkhel leh satliah tur te leh a laihawl ni tur ringawta rawn kir tur chi player a ni lo. Nomawi lak a duh a, a tha ber nih a duh a, chu chu he sports-a legend a nih chhan pawh a ni a. A training leh inbuatsaih danah Grand Slam-a chak leh a tum a ni,” a ti.

Nadal-a hian kum 2024 lo thar tur hi a season hnuhnung ber a ni thei tawh tih a sawi a. A khel a tihnat hnua rei tak a chawlh avangin ranking-ah pawh tlahniam duai duaiin No. 670-na daih a ni tawh.

Kum 2009 leh 2022-ah Australian Open-ah hian lo champion tawhin French Open-ah phei chuan vawi 14 leh nomawi la tawhin champion ngun ber a ni.

World No. 2 Carlos Alcaraz pawhin a hnampui hi kir leh turin a inpeih tih a ring a, ani hi Nilaini khan Djokovic nen Riyadh, Saudi Arabia-ah exhibition match an khel nghe nghe.

“A practice lai video tlem ka en a, 100% a ni leh tawh,” tiin kum 20 mi, Alcaraz hian a sawi.

“Player thenkhat, tun hnaia Rafa nena practice-te pawhin a tha ber level-ah a kir leh tawh tih an sawi a, top level a ni leh tawh a. Kuminah hian thil ropui tak ti turin a inpeih leh tawh niin ka ngai,” a ti.