Australian Open 2022-a men's single final-a Daniil Medveded hneha a champion khan Rafael Nadal hian US dollar mtd 2 a hlawh chhuak a, a pumpui thuin Spaniard hian a career-ah prize money atangin US dollar mtd 127 a hlawh chhuak tawh a, a tizat a hlawh chhuak tawh chung hian a ni aia hlawh tam mi pahnih awmin chung mite chu Novak Djokovic leh Roger Federer te an ni. 

Rafael Nadal hian Grand Slam title 21 zet la tawhin mipa zingah Grand Slam title la hnem ber a nichung hian khawvel tennis player ropui-ah kan chhiar thei a ngem? Nge hmasawnna tur ala nei kan ti zawk. 

Nadal hian prize money vaw chhuak tam tawh viau mah se, a el pui ber pahnih Novak Djokovic leh Roger Federer te a la phak lo va, ATP World No. 1 Djokovic hian a la tam ber a ni. A career pumah Serb tennis mi hrang hian prize money atangin US dollar mtd 155 a hlawh chhuak tawh a ni. 

Mi tam takin tennis player ropui tia an sawi fo thin Roger Federer hi pahnihna niin a career-ah prize money US dollar mtd 130 million chuang a hlawh chhuak ve tawh bawk. 

Anni pathum zingah hian Federer hian endorsement zawng zawng te nen chuan sum a la lut tam ber tawh thung a, Swiss mihrang hian nikum chhung khan match 13 chuh a khel chungin US dollar mtd 80 a la lut thei tho. Hetiang zat a lakluh theihna chhan lian ber pakhat chu Federer-a hian thawmhnaw company lian Uniqlo nen an thawh dunna atangin US dollar mtd 30 zet a la lut a ni. 

Nadal leh Djokovic te pahnih hian kum khat chhungin US dollar mtd 30 hi an la lut ve ngai manglo thung. 

Sportico sawi danin Nadal-a hian sponsor, prize money leh thil hrang hrangah US dollar mtd 490 million a hlawhchhuak tawh a, Spaniard sponson-tu lian ber chu sport thawmhnaw siam chhuaktu company lian Nike niin an ni hian kum tin US dollar mtd 10 an pe thin a ni. 

Australian Open final-a Nadal-a hneh tak Medvedev-a khan mipa tennis-ah rank 17-na a ni a, prize money atangin US$23 million a hlawh chhuak ve tawh a ni. 
Nadal, Djokovic leh Federer te hian tennis khawvel an la chawlh san loh avangin an sum lakluh pawh hi a la pung chho zel turah ngai ila, anni pathum hi tennis khawvel player ropui ber pathum an ni angin an record hi khum a har viauin a rinawm. 

Federer-a'n kum 2003 Wimbledon a lak atanga chhutin anni pathum Grand Slam title lak belh khawm hi 61 zet a ni tawh a, hemi hun chhung hian an ni pathum nilo player dang zawngin Grand Slam title 13 chiah an la ve hram a ni.