Naga model chhe lo zet mai Zuchobeni Tungoe nen an inhual hnuah, zaithiam Sanam Puri chuan baptisma a chang ve nghal hmiah mai le! 'Sanam' band-a an vocalist hian Ningani khan Lotha Baptist Church, Dimapur-ah baptisma hi a chang a, a nupui hual sakhua Kristian rinnaah a inhnimphum tihna a nih chu. 

Kum 25 mi Zuchobeni Tungoe hi Nagaland-a piang leh sei lian a ni a, a hmelthatna leh duhawmna hmangin India rama zaithiam hriat hlawh tak mai Sanam Puri a chhaithlu thei hial mai. 

An inhual ta e!
Sanam Puri leh Zuchobeni Tungoe te hian Thawhtanni khan an inhual thu an puang a, an chanchin hian ngaihven a hlawh nghal hle. Delhi tlangval Sanam Puri leh hmarchhak nula Zuchobeni te hian Instagram kaltlangin an inhual thu hi an puang a, inneih an tum hnai a ni mai thei Sanam Puri pawhin baptisma a chang fel der tawh. 

Kum 30 mi Sanam Puri hian a nupui hual Zuchobeni Tungoe hi a duh hlerh hlerh viau a nih hmel a, an sakhua leh hnam tihdan pawh a zah sak hle tih hai rual a ni lo.

Tunge Zuchobeni chu?
Zuchobeni Tungoe hi Naga nula zingah chuan hriat hlawh ber pakhat a ni a, soial media lamah pawh a lar hle. Zirlai ni mah se a tuina modeling leh zai lamah theih tawpin a inhmang reng tho a, YouTube lamah pawh a zai ngaithlatu an thahnem thei viau mai. 
Miss India Nagaland hi Kids for Fame 2011 winner a lo ni tawh a, Miss Dimapur 2019 leh Miss Fashion Icon atante thlan a lo ni tawh bawk. 

Zirna lamah chuan - Bangalore-ah engineering a zir a, mahse a zawh hmain a tawp san. Hemi hnu hian Mumbai lamah Mass Media a zir zui leh a, tunah hian Bachelors a timek a ni. Hmarchhak mite harsatna tawh thin ang tho tihduhdahna leh enhranna a tawk nasa ve hle a, hei hi a hmel lan dan a danglam bik vang a ni. Enhran a tawh avang hian depression hial a neih phah a, amhse huaisen takin a patlang thei.