Aizawl: Mizoram Legislative Assembly budget session chu naktip Thawhlehni hian tan a ni dawn a, March ni 31,2016 thleng a awh ang. Ruahman dan chuan session tan ni hian Larsap in House ah thu a sawi ang a, a tuk Nilaini (16.3.2016) ah sunna hun hmangin zawhna leh chhanna hun hman zawhah Larsap thusawi vanga lawmthu sawina hun hman a ni dawn a. House in a sun tur hi tunhnaia boral J&K Chief Minister Mufti Mohamed Sayeed a ni. Ni 17.3.2016 ah Lalsawta Finance Minister in kum 2016-2017 Mizoram budget leh kum 2015-2016 sum hman dilbelhna te Houseah a pharh ang a, Zirtawpni (18.3.2016) ah zawhna leh chhanna bakah Private Member resolution sawiho a ni ang. Zirtawpni thleng khan Assembly Secretariat chuan House a chhan chi zawhna (starred question) 296, ziaka chhan chi zawhna (unstarred question) 29, papet lay tur 3, Resolution 56 an dawng tawh a, Bill erawh dawn an la nei lo thung.