ZALEN October 19, 2025: Mizorama tlawmngai pawl lian ber, Young Mizo Association (YMA) Inkhawmpui Lian vawi 75-na chu naktip Thawhlehni zan atang hian Chengkawlawn Rûn, Sakawrdai-ah neih tan a ni dawn a, agenda 10 a awm a, Ningani zan thleng a awh ang.

YMA inkhawmpui tan zan hian bialtu MLA Lalchhandama Ralte-in thu a sawi ang a, Nilaini-ah rorel inkhawm a awm ang.

Zana vantlang inkhawmah khuallian, Chief Minister Lalduhoma’n thu a sawi dawn bawk a ni.

Inkhawmpuiah hian agenda eng emaw zat ngaihtuah tur a awm.

INKHAWMPUI AGENDA:

A. YMA khawih

1. YMA inkaihhruaina leh nihphung leh hruaitute

mawhphurhna, rampumah inzirtirna neih ni rawh se.

2. Mizoram chhunga hnamdang sumdawng, phalna nei lo tam ta lutuk hi titlem turin YMA-in hma la rawh se.

3. Mizo hmeichhia ten hnamdang pasala an neih zel loh nan Central YMA hian inzirtirna nasa zawkin kalpui rawh se.

4. Mizo Infiamnate chawisan a nih theih nan Central YMA-in hma la rawh se.

5. Zohnahthlak chi peng hrang hrangte Mizoram a chengte zingah chi bil hmalakna a awm tawh loh nan Central YMA-in hma la rawh se.

B. Sawrkar khawih

1. Inner Line Permit (ILP) hi tun aia khauh leh awmze nei zawka kalpui a nih theih nan YMA-in Sawrkar-ah thlen rawh se.

2. Tui hnar humhalh dan siam ni rawh se. (The Mizoram

Water Source Catchment Area Protection Act & Rules).

3. Mizoram chhunga inkalpawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theih nan Mizoram Sawrkarin tun aia chak zawkin hma la rawh se.

C. Kumpuan rawtna

1. Ruihhlo Do

2. Ram leh hnam humhalh