Aizawl December 3, 2023 : Mizoram MLA inthlanpui 2023 a vote tla te chu naktuk tukin zing dar 8 atang hian district khawpui hrang hrangah chhiar a ni dawn a, chawhnu lamah chuan result hriat theih beisei a ni.

ZALEN in Election department thawktute hnen atanga thu a dawn danin naktuk vote chhiarna ah hian postal ballot leh home voting te chhiar hmasak a ni dawn a, hemi hnu hian EVM a vote tla te chhiar leh a ni ang. Vote chhiar tur hian training tum engemaw zat neih tawh a niin a rang thei ang bera result hriat a nih theihnan hmalak a ni a, ruahman anga thil a kal theih chuan chawhnu dar 2 velah chuan result pum hriattheih beisei a ni.

Kuminah hian Election Commission of India ruahmanna in MLA bial tina VVPAT thlanbik polling station 5 a vote tla te leh EVM a vote tla te a inmil em tih chhiar a ni dawn a. VVPAT vote chhiar tur hi thlanbik la awm lovin ruahman chawp tur a ni a, polling station 200 a VVPAT hi chhiar a ngaih dawn avangin hun a duh deuh mai thei niin Election department thawk te chuan an sawi a. Kumin vote chhiarna ah hian mi 4000 vel an inhnamnawih dawn nia thudawn a ni bawk. Mizoram pumah EVM dawhkan 399 awmin vote chhiarna (counting centre) 13 bakah postal ballot table 56 a awm dawn a ni.

Vote tla te hi district khawpui hrang hrangah a ruala chhiar tur a ni a, general observer leh counting observer ten bial tina vote chhiar hi an vil dawn a ni.

Mizoram district hrang hranga vote chhiarna tur-

Mamit   DC Office complex

Kolasib   Govt. Kolasib College

Aizawl   Assembly Secretariat

    DC office building

    Govt. Aizawl College

    Assembly Secretariat Annexe building

Champhai   DC Office complex

Serchhip   DC Office complex

Lunglei   Saikuti hall

Lawngtlai   Govt. Lawngtlai college

Siaha   Govt. Siaha college

Saitual   DC Office

Khawzawl   DC Office

Hnahthial   DC Office