Mahindra Pickup 4x4 LPS Pro Muaythai inbuk hun ni khatin sawn hlat a ni a, naktuk thawhlehni zing dar 8-ah Zarkawt Recreation Centre-ah an inbuk ang.

October 3, thawhtanniah inbuk tura tih a ni a, hmun danga awm tel duh thenkhatin an ngenna leh inbuatsaihna a fel fai zawk theih nan thawhlehniah tel tumte an inbuk dawn a, tel tlak an nih leh nih loh an hriselna endik a ni dawn a ni.

Inrinni tlai thlengin mi 123-in tel tumin form an theh lut tawh a, thawhṭanni hian a la theh luh theih. Tun ni hnih chhungin mi 50 chuangin an theh lut a, tunhnaiah boruak a len thar bakah LPS Pro Fight-a tel zingah chona thar hmachhawna cage chhunga inbeihnaa tel tura form theh lut an awm mek a ni.

Muaythai Association of Mizoram chuan an pawl chhungah boruak a lian hle tih an sawi a, an fighter thate tan inpho chhuahna hun tha a nih dawn bakah inelna sang zawka tel thei tura hmasawnna rahbi pawimawh a nih dawn avangin technical lamah pawh an inpuahchah uluk hle tih an sawi.

October 7 atangin R Dengthuama Indoor Stadium, Mualpuiah tan a ni dawn a, weight hrang panga, kg 48 chin hnuai lam fly, kg 48 leh 54 inkar bantam, kg 54 atanga 63.5 inkar light, kg 63.5 atanga kg 71 inkar welter leh kg 75 chin chung lam super middle huangah title inchuhin, lawmman pawisa fai Rs 3,60,000 sem chhuah tura ruahman a ni.