Aizawl; Vawiin June 15 hi Mizoram-a Mizo inthlunkhawmna pawl lian ber leh tlawmngai pawl lian ber Young Mizo Association (YMA) din champha YMA Day vawi 79 na a ni a, Pathianni anih avangin Mizoram sawrkar chuan hlim taka hman anih theihnan naktuk Thawhtanni hi pisa chawlh ah a puang a, YMA Branch hrang hrang ten naktuk ah YMA Day hi an hmang ang. Kumin YMA Day thupui atan hian ‘Ram leh Hnam humhalh’ tih hman a ni a, Central YMA chuan Branch hrang hrang te chu tanpui ngaite tanpuinan te, vengchhung tihfai nan leh a chhe lai siamthatna huna hmang turin an ngen. Central YMA hruaitute pawh hmun hrang hrangah insemdarhin he ni hi an hmanpui dawn a, Central YMA President Lalbiakzuala chuan Electric Veng, Khatla, Mission Veng North leh Mission Veng South YMA ten Day an hmanna hi a hmanpui ang a. Vice President Vanlalrema Rokhum chu Ngopa ah, General Secretary Vanlalruata chu Tuikual North leh South ah, Asst. Secretary Lalhmachhuana Bungtlang Joint YMA ah, Treasurer J.Lalsailova Model, Mission veng North leh South ah, Finance Secretary Lalrochuanga Pachuau Lungpho Branch YMA ah te an hmanpui dawn a ni. Nimin Inrinni khan Aizawl khawpui chhunga Branch tam tak chuan YMA Day pual hian veng chhung thenfai hnatlang an nei a, naktuk zinga hnatlang tur pawh engemaw zat an awm bawk. Tunah hian YMA hian Mizoram mai bakah Assam, Manipur, Tripura, Meghalaya leh Nagaland ah te Branch an nei thluah tawh a. Sub Headquarters 5, Group 47 leh Branch 772 a nei mek a ni. YMA (YLA) HRUAITU hmasa ber te 1935-36 President : Pu Niara Vice President : Pi Zaii Gen. Secretary : Ch. Pasena Asst Secretary : Vankhuma Treasurer : Zorema Pa June ni 15, 1935 khan Christian missionary leh Mizo ringtu hmasa ten an din a ni a, a hming hmasa chu Young Lushai Association (YLA) a ni. October ni 7,1947 khan Young Mizo Association tia thlak a ni.