Mizorama cricket khelmual a neih chhun, Sihhmuia Suaka Cricket Stadium chuan a neitute hmalakna zarah hma a sawn zel a, nakuma tuna hna kal lai mek thawh zawh a nih hnuah phei chuan international match pawh thleng thei khawp a ni tawh dawn a, Ranji Trophy pawh khelh theih beisei a ni.

Tunah hian he khelmual neitu, Cricket Association of Mizoram (CAM) chuan Rs. Vbc 50 dawn senna tur project pahnih hmangin a tihchangtlun hna a thawk mek a. Nakumah chuan an thawh zawh an inbeisei.

CAM hian Inrinni khan 1st Veteran Cricket Tournament final chhim tura a sawm MJA General Headquarters member-te chu zanriah kilpui pahin an hna thawh leh hmachhawpte hrilhin an hmunhmate an fanpui.

An president, Lalrochhuanga hova an inkawmnaah khelmual tihchangtlun nan anmahni puala Rs. vbc 31.5 senna tur bakah Board of Control for Cricket in India (BCCI) sum hmuh Rs. Vbc 18 an nei a, chumi hmang chuan hna an thawk tih a sawi.

CAM project hnuaiah hian chhawng lia sak tur inkhel entute thutna tur gallery leh mikhual thlenna tur te, player-te inthlakna tur te, ei rawngbawlna leh chaw eina tur te, physiotherapy room te, media room, commentator room, referee room, VIP room, office, multipurpose room, indoor game room leh thil dang eng emaw zat a awm dawn a ni.

BCCI project hnuaiah hian indoor cricket pitch, tuichenna, gymnasium leh thil dang eng emaw zat a awm dawn tih an sawi a. Heng hna pahnihte hi kum 2025 chhungin an zawh hman tur thu CAM hruaitute chuan an sawi.

Hna thawh zawh hunah chuan international match pawh an thleng thei dawn tih CAM hruaitute chuan sawiin, "Tunah pawh hian ground bik hi chu international match khelhna tlak a ni a; mahse, player-te inthlakna leh mamawh hrang hrangte kan la neih that loh avangin kan la thleng thei lo a ni," an ti.

Peih fel a nih hunah chuan BCCI hnuaia association-te inelna sang ber, Ranji Trophy pawh home match khelh nan hman theih a ni tawh dawn tih an sawi bawk.

Suaka Cricket Ground hi a hmun petu, Lal Rotluanga pa hming chawia a hming hi phuah a ni a. Kum 2010 khan a sakna tur lung phum niin DoNER ministry atanga sum hmun Rs Vbc 11 hmanga bul tan a ni a, inkhelh theihna peih a nih hnuah May 23, 2014 khan CAM kuta hlan niin tun thlengin a tihchangtlun hna hi thawh niin hma a sawn zel a ni.