Aizawl; Damdawi chi khat na chhawkna atana ei tur ni awm tak 'Flame' chu April 2016-a siam anga ziah ni si zawrh chhuah a nih tawh thu Social Media lamah a darh chiam mai a, ngaihven a hlawh hle a. He damdawi hi vishal pharmaceuticals company siam chhuah angin damdawi kawmah hian a in ziak a ni. He thil chungchangah hian Mizoram state drugs controller's hotute chuan damdawi lem nia ngaih theih 'Flame' chungchang chu report an dawn tawh thu Zalen an hrilh a, a zuar chhuaktute an zawn mek thu an sawi a. 'Flame' zuar chhuaktu damdawi dawr emaw mimal ang hria chuan Mizoram state drugs controller-ah a rang lama report vat turin mipui an ngen thu an sawi. Lalsawma, Joint Director (Food & Drugs), chuan damdawi reng reng chu a siam chhuah hun dik lo a awm chuan man nghal theih a nih thu sawiin'Flame' pawh chu zuar chhuaktu an hmuh chhuah hunah an man nghal vek tur thu a sawi a. Kum 2015 kum chanve kan hmang awrh chauha 2016-a siam chhuah nia in ziak zawrh chhuah chu dan in a phal loh thu a sawi bawk a ni. Doctor thenkhat ten Zalen an hrilh danin tunlai hian damdawi lem a tam hle a, company mumal lo siam chhuah man tlawm zawka zawrh chhuah pawh a awm nual nia an hriat thu te an sawi a. Mipuite pawh doctor chawh chauh damdawi rin tlak chauh ei tura an duh thu sawiin, damdawi lem lakah fimkhur turin an chah bawk. Hetihlai hian damdawi zuar thenkhat Zalen palaiin a kawmte chuan 'Flame' chu an zawrh loh thu sawiin, social media atanga an hriat ve mai thu an sawi thung a ni.