Zan khat chu ka inbual zo, mut ka tum hnai tawh tihah hian phone call ka dawng a, “Police Station lamah i kal ang hmiang,” a rawn ti a, a chhan a sawi chu a pawimawh viau lah tak a; tichuan, ka insiam mawlh mawlh a, Police Station lamah chuan kan va kal ta a, kan kal chhan tak chu kan han buaipui zung zung a, naktuk lama la bawhzuia tifel mai tur chuan kan inbe thlu a, chu ai mah chuan ka thil hmuh chuan ka thinlung a luah tlat mai pek a, chu chu ka sawi tum ber zawk chu a ni. Ka kalpuite nen chuan Police Officer chu kan dinchilh a, kan tawng mawlh mawlh lai chuan piah deuhah hian pa pakhat hi plastic chair-ah thuin vawt a tih hmel hle mai a, a track jacket hak lai ban atang chuan a ban la chhuakin a kuangkuah a, a khup a tawm bawk a, rem lo tak chuan chair-ah a thu a, a muthlu deuh diar diar bawk a, a thawmhnaw leh a hmel ka han en thuak atang chuan a fai lutuk lem lo tih pawh ka hre thei nghal mai bawk a, chutia ka thlir reng lai chuan chair atanga chhukin chhuat dai – cement chhuatah chuan thuin bang ngheng chuan mut a han tum leh ta zawk a, chutia danglam deuh taka a awm avang chuan a bula police duty chu a chanchin hetiang hian ka han zawt chiang ta a  ni. “Sawlaia mi saw in mi man em ni?” “Ni lo e, ti sawn a rawn riak ve fo thin a, khawlaia riah ai chuan hetia a riah mai hi a tan pawh tha kan ti zawk a, kan riahtir ve fo mai.” “E he, ti nge chhungte a nei lo em ni? A chhung ten an rawn ngaihven lo em ni?” “Chhungte chu nei e, (an veng hming a sawi a) chutah chuan an awm a, kan zawng chhuak tawh a, kan hrilh pawhin an rawn ngaihven chuang lo.” “Khaih aw! Engnge maw a chhan ni ang le? A nih leh a mah hi a sual em?” “Sual lo e, thil sual a tih thin pawh kan hre lo, heti hian a duh hun hunah a rawn kal a, ei tur awm ang ang hi kan pe ve mai a, a rawn tlangnel tawh khawp mai.” Hetiang hi police duty nen chuan kan inbiak dan tlangpui chu a ni a, ka hmuh lai reng chuan lock up chhungah chuan mutbu pein riahtir turin an luhpui ta a. Ka ngaihtuahnaa riak reng zawk chu - “Engvanga a chhungte hian rawn ngaihsak lo nge an nih ang?” tih leh “Rawn ngaihsak lo sela engtia enkawl zel tur nge ni ang?” tih chu a ni. Amah chu mi pangngai a pha lutuk lo tih chu a chiang reng a, mi dang tel lo chuan a hrawkah pawh pum puarna tur a lut lo ang tih pawh ka ring thiam nghal mai tho a, hetiang ni chung si hian engvanga a chhungte hian rawn ngaihsak lo nge an nih ang? A chhungte hi tanpui an ngai em ni zawk? tih te thlengin ka ngaihtuah a. A lehlam zawngin ka ngaihtuah leh a, a chhungte hian rawn ngaihtuah miah lo sela, hmun dangah riakin emaw, khawlaiah emaw vak vak sela mi kut palh ilo a tuar thei bawk si a, atan chuan hetia Police Station-a riah hi a tha thlawt a ni. Nimahsela, heti hian a riak reng thei bik awm si lo a, riak reng thei ta pawh lo niin lo khawngaih thei pawh ni sela ei tur a mamawh tho avangin an pe reng thei ang em? Tangkaina a neih bawk si loh chuan chawmhlawm ringawt chu a lo buaithlak ve theiin tlin loh chin a awm lo thei si lo a tih te leh lo boral hial ta sela engtin nge ni ang? tih te thleng pawhin ka ngaihtuahnaah a awm a. He pa hian engtin nge khawvel hun a hman chhoh zel anga, mi zarzo ringawt hian a awm reng thei ang em? tih lam ngaihtuah ai mah chuan hetiang hi kan Aizawl khawpuiah hian mi dang awm ve theih avangin engtia enkawl tur nge ni ang? tih chuan ka thinlungah hmun a luah tam zawk mah a, amahah chuan beisei tur a tam lo tih chu a hriat laiin a kianga mite chuan tha takin enkawlin awmpui thin mah sela buaithlakna chin a awm ngei dawn tih a hriat nghal tho si. Kan Kristian ramah hian hnathawh tur a va tam sawtin Krista hnung kan zuina theuhah hian pawl ang leh mi mal ang pawh hian awm mai mai hman a va ni lo em tiin keimah ngei pawh chu chona lian tak min pe zawk a.