Kum 33 hi rei tak a ni a, kum 1990-a nau piang kha tunah chuan kum 33 zet a ni tawh dawn a; hmeichhia a niha pasal a la neih loh phei chuan ‘senior’ tia sawi a hlawh fo tawh ang.

Chutiang zeta rei chu Italy-a Naples khaw miten an lo nghak tawh a, tunah chuan an nghak chhuak ta a, Scudetto nomawi chu an khawpuiah an lawm lut thei ta.

Ningani zan khan Napoli hian Udine khawpuiah Victor Osimhen-a goal hmangin Udinese chu 1-1 in an hnehtawk a, Serie A-ah khelh nga la nei chungin champion an ni ta.

Udinese tana Sandi Lovric-a thun chu minute 52-ah Nigerian striker hian sutin khelh ruk an la neiha nomawi la tura point khat an mamawh an thawk chhuak a, kum 1990-a Diego Maradona hova an lo lak tawh nomawi chu an la kir veleh ta a ni.

“Neapolitan-te hlim leh lawmna hi i lo suangtuah thin lawmna i inpek theih ang kha a ni mai,” tiin Napoli boss Luciano Spalletti chuan DAZN hnenah a sawi.

“Heng mite hian hun harsaah pawh he hun hi an thlir a, hetianga lawm hi an phu a ni. An hlimna thlentu i nih chuan i hahdam sawng sawng ang,” a ti.

Napoli-in Italian champion nomawi an lak hnuhnung pahnih kha Argentina legend Maradona hun lai, kum 1987 leh 1990 kha a ni a, tunah chuan an khelmual hming pawh an mi huai kal hmasa hmingchawiin an thlak tawh.

Ropui taka Maradona hova hun an hman hnuah sum lamah an tlachhia a, division hnuai zawkah tlain kum 2006 phei kha chuan Serie C hialah an awm a ngai.

Season 11 liam ta chhung khan Coppa Italia vawi thum lai la mah se an duh ber, Napoli tantute thlakhlelh chu Scudetto a ni.

Tunah chuan an duh ber chu an nei ta a. Hemi atan hian an boss leh player dangte bakah Nigeria forward Osimhen a langsar a, league-a vawi 26 a inlanah goal 21 a thun a, Georgia winger Khvicha Kvaratskhelia chu an player pawimawh bel zingah telin goal 12 a thun a, mi dang thun tur vawi 10 a siamsak bawk.

Kum 64 mi, boss Luciano Spalletti pawh Seria A nomawi la thei upa ber a ni ta bawk a, a hmain Roma nen Coppa Italia vawi hnih a lo la tawh bawk.

A team hi khelh ruk la awma champion thei dinhmunah a kaihruai a; mahse, kar hmasa khan Salernitana an hnehtawk hlauh avangin an champion zo mai bik lo va; mahse, Ningani zanah erawh an mamawh thawk chhuakin point 16 zeta Lazio an tlansan tawhna nen a vawi thum nan Serie A a lakpui ta a ni.

Napoli tantute hi Nizana an inkhelh hma, chhun lam atang tawhin Naples khawpuiah chuan an party tawh a ni ber a, Stadio Diego Armando Maradona-ah Udine pan ve thei loten inkhel an en a, Osimhen-an goal a thun leh inkhel a tawp chiah phei chuan thawm chu turu tak a ni.

An khawpui atanga hmar lam, Udine-a hian an team chu mi 10,000 velin an zui a; mahse, minute 13-naa Lovric-a’n an lama a thun chuan an ngawi duk mai. Chawlhlawk hmain Napoli hi an khel turu lo hle a; mahse, tan leh hnuah Kvaratskhelia chuan tha taka petin Udinese keeper Marco Silvestri-a’n dansak mah se Osimhen erawh a dang zo ta lo va, Napoli tantute leh Naples khawpui chu an sapatal!

Hun tawp hamrik a rik chuan Udine leh Naples khawpuia inkhel entute chu lawmin khelmualah an tlan lut a, dan theih an ni lo.

“A nuam lutuk, kum tam tak kan lo nghah tawh kha a lo thleng ta,” tiin champion-na goal thuntu, Osimhen chuan DAZN hnenah a sawi.

“Neapolitan-te hnena Scudetto hlantu nih chu kan theihnghilh tawh dawn lo va, kan nunah hian a châm reng tawh ang,” a ti.

Napoli-in Scudetto an la dawn tih a chian chiah hian Maradona hming a ri ring zual a, an captain hlui, khawvela footballer ropui bera mi tam takin an ngai hi November, 2020 khan thi tawh mah se Naples mipuite thinlungah a thi thei lo.

A hova vawi hnih an lo lak tawh nomawi la thei dinhmuna an din atangin thlir tinah a thlalak leh a lem ziah a ni a, Ningani zana an champion tih a chian hnuah pawh fan-te thlalak lek chhuah tam ber chu Argentine legend thlalak hi a nih ngei a rinawm.

Napoli tantu tam tak hian Maradona khel hi an hmu hman lo va, a video leh thlalak atang baka hre pha lo sang rualin an chawimawi a, an thinlungah ‘lalah an pawm’ pawh ti ila kan sawi sual kher lo vang.