Aizawl: Ministry of Human Resource Development chuan rampum huap zirtirtu tha chawimawina dawng tur thlan danah kalphung thar a tichhuak a, hetah hian sorkar leh a hnuaia school-a thawk zirtirtute chuan direct-in dilna an thehlut thei dawn a ni. Kalphung thar turah hian zirtirtute chuan direct in dilna an thehlut thei tawh ang a, hetih rual hian independent jury hmaah presentation an paltlang leh a ngai thung dawn a ni. Ram pum huapin award dawng thei tur nomination 145 chauh siam theih a ni a, Mizoram atang chuan zirtirtu 3 a nominate theih a ni. Kalphung thar hnuaiah hian national award diltu chuan online portal kaltlangin a dil hnuah district leh state level committee te a paltlang a ngai leh ang a. Hemi zawhah hian national level - independent jury hmaah nominee te hian presentation an pe leh dawn a ni.