India rama state leh union territory 25 atanga fighter 384 zet inlanna, ActiveFit Expo 2024 MMA India Open National Championship-ah Mizo tlangval pathumin medal an la.

Kar kal ta Inrinni atanga Thawhlehni inkara Mumbai, Maharashtra-a inelna neihah hian Mizoram aiawhin Mizoram State MMA Association (MISMA) chuan fighter pathum a tir a. An vai hian national championship-a an inlan vawi khatna vek niin pahnihin medal lain pakhatin special award a dawng phak a, state danga Mizo awm pakhatin a la bawk.

Junior Featherweight (-65.8 kgs) huangah Lalnunsanga, Chawnpuiin gold medal a la a. Nunsanga hi a che tha hle a, quarter final-ah unanimous decision-a chakin semi-final-ah Technical Knock Out-in a chak leh a, final-ah phei chuan knee bar submission hmanga chakin inelna pum puia hetiang submission ti thei awm chhun a ni nghe nghe.

Benjamin R.Lalremmawia, Ramthar North/Ngopa Chhim Vengin Youth–A Flyweight (-56.7 kgs)-ah bronze medal a la bawk.

Medal dawng phak lo mah se Bawngkawn South tlangval, Lalramsangliana chu vawi khat khelhna zinga khel tha pawl, khual zahawm special award hlan a ni bawk.

MISMA-in fighter pathum a tirhte bakah hian hna thawhna leh zirna avanga state danga awm Mizo pahnih, George Lalmuanawma, Kerala leh Marcus Lalsangzuala Sailo, Uttar Pradesh te chu he inelnaah hian an inlan bawk a, George-a hi a champion.

LPS Pro Muaythai Fight-ah pawh final lo lut tawh, George-a hi tun tumah hian Senior Featherweight-ah a inlan a. Marcus-a erawh chuan lawmman a la pha ta lo thung a. MISMA chuan state pawna Mizo figter pahnihte hi a lawmpui hle.

He inelnaah hian MISMA Technical Chairman Samuel Lalrozama chu national board member a nih angin a tel ve bawk a, ani hi National Referee & Judge Commission-te uap tura ruat a ni.

ActiveFit Expo 2024 MMA India Open National Championship-ah hian fitness exhibition, fitness stall leh event hrang hrang a awm a. MMA championship bakah hian kickboxing, bodybuilding, powerlifting leh fitness modeling competition a awm bawk.

MMA India hian kum khat chhungin national championship vawi khat leh national open vawi thum atanga vawi nga vel a huaihawt thin a, hengte hi fighter-te hnena professional fighter nihna kawnga tawnhriat siamsak a tumna pakhat a ni.

ActiveFit Expo 2024 MMA India Open National Championship-ah hian a pum puiah Maharashtra an champion-in Karnataka-in an dawt.